,,მინარეთის აშენება კანონდარღვევით მოხდა, თვითნებობასა და უკანონობაზე კი ხელისუფლება თვალს ვერ დახუჭავს", _განაცხადა პრემიერ-მინისტრმა ბიძინა ივანიშვილმა ,,ამბასადორალზე" სიტყვით გამოსვლისას ადიგენის რაიონში მომხდარი ინციდენტის კომენტირებისას.
მისივე განცხადებით, რელიგიური შემწყნარებლობა, რელიგიური გრძნობების პატივისცემა არა მხოლოდ ეროვნული ტრადიციაა, არამედ საქართველოს კონსტიტუციის ერთ-ერთი ფუნდამენტური დებულებაა.
,,მე ღრმად მწამს, რომ ეს ტრადიცია არსად გამქრალა, რადგან ჩვენი ხალხისთვის სრულიად ბუნებრივია მშვიდობიანი თანაცხოვრება. რელიგიური შემწყნარებლობა, რელიგიური გრძნობების პატივისცემა არა მხოლოდ ჩვენი ეროვნული ტრადიციაა, არამედ საქართველოს კონსტიტუციის ერთ-ერთი ფუნდამენტური დებულებაა. სწორედ ეს მაფიქრებინებს, რომ სოფელ ჭელაში მომხდარ ინციდენტს არაფერი აქვს საერთო რელიგიურ შეუწყნარებლობასთან. მინარეთის აშენება კანონდარღვევით მოხდა, თვითნებობასა და უკანონობაზე კი ხელისუფლება თვალს ვერ დახუჭავს. თუ სოფელ ჭელაში მინარეთის დემონტაჟის პროცესში ან აქციის მონაწილეთა მიმართ დარღვეული იყო კანონი ან გამოყენებული იყო გადამეტებული ძალა, ფაქტები იქნება შესწავლილი და მოჰყვება სათანადო რეაგირება. ოღონდ ამ პროცესში უაღრესად მნიშვნელოვანია, რომ მხოლოდ სახელმწიფომ, კანონმა და სასამართლომ აღადგინოს სამართლიანობა. თუმცა, როდესაც საქმე რელიგიურ გრძნობებს ეხება, ხელისუფლებას მეტი სიფრთხილე გვმართებს, რადგან ეს მეტად სათუთი თემაა ნებისმიერი აღმსარებლობის ადამიანისთვის. ქვეყანაში რელიგიათა შორის თანხმობასა და მშვიდობას ალტერნატივა არა აქვს", _განაცხადა ივანიშვილმა.
