,,ჩვენმა მეგობრებმა მოგვიწონეს რუსეთთან დიალოგის ფორმატი, როგორც დაძაბულობის შემცირებისაკენაა მიმართული", _განაცხადა პრემიერ-მინისტრმა ბიძინა ივანიშვილმა ,,ამბასადიორიალზე" სიტყვით გამოსვლისას.
მისივე განმარტებით ქართული მხარის მიერ გადადგმული პოზიტიური ნაბიჯების მიუხედავად რუსეთის ქმედებები არაადეკვატურია.
" ჩვენ დავიწყეთ რუსეთთან ურთიერთობის გაუმჯობესება. მოგხსენებათ უკვე გადაიდგა პრაგმატული ნაბიჯები რუსეთთან ურთიერთობის პოზიტიურად განვითარების მიმართულებით, კერძოდ, ვაჭრობის ეკონომიკისა და კულტურის სფეროებში. აღსანიშნავია, რომ ჩვენმა მეგობრებმა მოგვიწონეს რუსეთთან დიალოგის ეს ფორმატი, როგორც კონსტრუქციული ნაბიჯი მიმართული დაძაბულობის შემცირებისაკენ. სამწუხაროდ, უნდა აღინიშნოს, რომ ჩვენი დიდი ძალისხმევის მიუხედავად, რუსეთმა კვლავ გადმოწია მავთულხლართები ჩვენი ქვეყნის სიღრმეში, რაც ნამდვილად არ არის ადეკვატური პასუხი იმ პოზიტიურ ნაბიჯებზე, რომელიც ბოლო დროს ორ ქვეყანას შორის განხორციელდა. მიუხედავად ამისა, ჩვენ ვინარჩუნებთ სიმშვიდეს და კვლავ თანმიმდევრულად მივდევთ ჩვენს მიერ დასახულ პრაგმატულ პოლიტიკას. აქტიურად ვიყენებთ ჟენევის საერთაშორისო მექანიზმებსა და თანამშრომლობის ორმხრივ ფორმატებს", - განაცხადა ბიძინა ივანიშვილმა.
ივანიშვილის განაცხადებით, საერთაშორისო თანამეგობრობის მხრიდან დიდი მნიშვნელობა აქვს საქართველოს ტერიტორიული მთლიანობის, სუვერენიტეტისა და არაღიარების პოლიტიკის მხარდაჭერას.