ივანიშვილის თქმით, "საქართველოსთვის უმნიშვნელოვანესი იქნება ვილნიუსის სამიტი და ევროკავშირის წევრ ქვეყნებში საქართველოს დიპლომატიური წარმომადგენლობების ხელმძღვანელები ძალისხმევას არ დაიშურებენ ევროკავშირთან ასოცირების შეთანხმების პარაფირებისა და შემდგომ წარმატებით ხელმოწერის უზრუნველსაყოფად"

"ჩვენი მიზანია, დავამკვიდროთ კანონის უზენაესობა, შევქმნათ დემოკრატიული ინსტიტუტები, გამჭვირვალე გავხადოთ სახელმწიფო ინსტიტუტების მუშაობა და გადაწყვეტილებების მიღების პროცესი, განვავითაროთ სოციალური პოლიტიკა, რაც გახდება თითოეული ჩვენი მოქალაქის კეთილდღეობის საწინდარი. ამ მიზნების მისაღწევად ჩვენმა ხელისუფლებამ საკონსტიტუციო და სოციალურ-ეკონომიკური რეფორმების განხორციელება დაიწყო და მინდა, აღვნიშნო, რომ უკვე გარკვეულ წარმატებებსაც მივაღწიეთ. აღდგა ხელისუფლების საკანონმდებლო და აღმსარულებელ შტოებს შორის ბალანსი და კონტროლი, განხორციელდა სასამართლო სისტემის რეფორმა, რომელიც დაემყარა არასამთავრობო სექტორისა და საერთაშორისო ორგანიზაციების რეკომენდაციებს. მიმდინარეობს მთელი რიგი სოციალურ-ეკონმომიკური რეფორმები და მათი შედეგები უკვე იგრძნო ჩვენი საზოგადოების დიდმა ნაწილმა, განსაკუთრებით სოციალურად დაუცველმა ფენამ. უნდა აღინიშნოს, რომ 2012 წლის საპარლამენტო არჩევნების შემდეგ ჩვენ პოლიტიკური თანაარსებობის რეჟიმში ვმუშაობდით, რისი გამოცდილებაც საქართველოს აქამდე არ ჰქონია. მოგეხსენებათ, ურთიერთობის ასეთ ფორმატს თან ახლავს ობიექტური სირთულეები, მაგრამ მიუხედავასდ ამისა, ქვეყნისთვის მნიშვნელოვან საკითხებზე თანამშრომლობა მაინც შედგა. ბოლო ერთი წლის განმავლობაში დემოკრატიზაციის გზაზე მიღწეული წარმატებები მაძლევს იმედს, რომ ჩვენს ქვეყანას უფრო მეტად გაეხსნება გზა ევროპული და ევროატლანტიკური ინტეგრაციისაკენ. ჩვენ არაერთხელ განვაცხადეთ და ახლა კიდევ ერთხელ მინდა ხაზგასმით ვთქვა, რომ ევროპული და ევროატლანტიკური ინტეგრაცია ჩვენი ქვეყნის საგარეო პოლიტიკის ქვაკუთხედია. ჩვენ ყველას - ხალხსაც და ხელისუფლებასაც კარგად გვესმის, რომ ევროპული და ევროატლანტიკური ინტეგრაცია ერთადერთი გზაა, რომელიც ჩვენს ქვეყანას შესაძლებლობას მისცემს ჩამოაყალიბოს ნამდვილი დემოკრატია. მხოლოდ ეს განაპირობებს ქვეყნის ეროვნული უსაფრთხოების განმტკიცებასა და დემოკრატიულ განვითარებას. ამ თვალსაზრისით, საქართველოსთვის უმნიშვნელოვანესი იქნება ვილნიუსის სამიტი. გვჯერა, რომ ევროკავშირის წევრ ქვეყნებში ჩვენი დიპლომატიური წარმომადგენლობების ხელმძღვანელები ძალისხმევას არ დაიშურებენ ევროკავშირთან ასოცირების შეთანხმების პარაფირებისა და შემდგომ წარმატებით ხელმოწერის უზრუნველსაყოფად. ამავე დროს, თუ დღეს ჩვენ ვილნიუსის სამიტისთვის ვემზადებით და კონკრეტული მოკლევადიანი ამოცანების განხორციელებისათვის ვზრუნავთ, არც ის უნდა დაგვავიწყდეს, რომ საჭიროა, სამიტის შემდგომ მიზენბსა და პერსპექტივებზე ვიფიქროთ,"- განაცხადა ბიძინა ივანიშვილმა.