საქართველოში მოქმედ არასამთავრობო ორგანიზაციებს 2013 წლის 27 ოქტომბრის საპრეზიდენტო არჩევნებში პარტია "საქართველოს გზის" საპატიო ლიდერის სალომე ზურაბიშვილის მონაწილეობის საკითხზე განსხვავებული პოზიციები აქვთ.
საქართველოს ახალგაზრდა იუსრისტთა ასოციაციის თავმჯდომარე კახა კოჟორიძე მიიჩნევს, რომ ცენტრალურმა საარჩევნო კომისიამ სალომე ზურაბიშვილის საპრეზიდენტო კანდიდატად დარეგისტრირებაზე უარი არ უნდა თქვას, რადგან მოცემულ შემთხვევაში ამ გადაწყვეტილების კანონიერი საფუძვლები არ არსებობს.
"არგუმენტები, რაც ცესკო-ს მიერ ორმაგი მოქალაქეობის მქონე პირთა მიმართებაში გაჟღერდა, სამართლებრივ და ლოგიკურ საფუძვლიანობას მოკლებულია და არც სასამართლოს გადაწყვეტილებას დავეთანხმები, რომელმაც ცესკო-ს გადაწყვეტილებას მხარი დაუჭირა, რადგან მე ვფიქრობ, საქართველოს კონსტიტუცია ცალსახად ადგენს იმას, რომ თუ ორმაგი მოქალაქეობის მქონე პირი არის ევროკაშირის წევრი სახელმწიფოს მოქალაქე და საქართველოს მოქალაქე, ეს არ არის დამაბრკოლებელი გარემოება იმისათვის, რომ ამ ადამიანმა არჩევნებში მიიღოს მონაწილეობა და პრეზიდენტის თანამდებობა დაიკავოს. აქედან გამომდინარე, მე არ ვფიქრობ, რომ ცესკო-მ სწორი გადაწყვეტილება მიიღო და თუ სალომე ზურაბიშვილთან მიმართებაშიც იგივე გადაწყვეტილებას მიიღებს, ეს ვფიქრობ, უკანონო გადაწყვეტილება იქნება,"- განაცხადა კახა კოჟორიძემ.
ამავე საკითხზე განსხვავებული პოზიცია აქვს არასამთავრობო ორგანიზაცია "საერთაშორისო გამჭვირვალობა საქართველოს". ორგანიზაციის ხელმძღვანელის ლევან ნატროშვილის განცხადებით, სალომე ზურაბიშვილის საპრეზიდენტო კანდიდატად დარეგისტრირება რამდენიმე მნიშვნელოვანი საკანონმდებლო ნორმის დარღვევას განაპირობებს, ამიტომ ცესკო-მ მის რეგისტრაციაში გატარებაზე უარი უნდა თქვას.
"უფრო იქითკენ ვიხრებით, რომ მას არ შეუძლია საპრეზიდენტო არჩევნებში მონაწილეობის მიღება. იმიტომ, რომ კონსტიტუცია პირდაპირ განსაზღვრავს, რომ პრეზიდენტის პოსტი შეიძლება ეკავოს მხოლოდ ისეთ ადამიანს, რომელსაც აქვს მხოლოდ საქართველოს მოქალაქეობა, ანუ ამ შემთხვევაში იგი ორმაგ მოქალაქეობას კრძალავს. აქ საუბარი იყო იმაზე, რომ კონსტიტუციის ერთ-ერთ მუხლში ასევე არ არის ნათლად ჩაწერილი, რომ მონაწილეობა შეუძლია თუ დანიშნვის შემდეგ შეუძლია მეორე მოქალაქეობის დატოვება თუ მონაწილეობაც არ შეუძლია, მაგრამ ჩვენ ვფიქრობთ, რომ მონაწილეობაც არ უნდა შეეძლოს. რაც შეეხება იმ გარდამავალ დებულებას, რომელიც სწორედ ამ ევროკავშირის მოქალაქის უფლებას შეეხება, რომ მიიღოს მონაწილეობა არჩევნებში, იქ საუბარია, რომ ეს ადამიანი უნდა იყოს დაბადებული საქართველოში. ჩენ რამდენადაც ვიცით, სალომე ზურაბიშვილი არ არის საქართველოში დაბადებული და შესაბამისად აქაც პრობლემა გვაქვს და საბოლოო ჯამში შეგვიძლია ვთქვათ, რომ წესით, ჩვენი აზრით ცესკო-მ სალომე ზურაბიშვილს რეგისტრაციაში გატარებაზე უარი უნდა უთხრას,"- განაცხადა ლევან ნატროშვილმა.
ცნობისთვის, პარტია "საქართველოს გზის" საპატიო თავმჯდომარის სალომე ზურაბიშვილის განცხადებით, იგი საპრეზიდენტო კანდიდატად დარეგისტრირებისთვის განაცხადს ცენტრალურ საარჩევნო კომისიაში ორშაბათს შეიტანს.
როგორც ზურაბიშვილმა დღეს გამართულ პრესკონფერენციაზე აღნიშნა, მომდევნო კვირის განმავლობაში იგი სხვადასხვა რანგის პოლიტიკურ ლიდერებთან შეხვედრებს გამართავს და უახლოეს მომავალში მისი საარჩევნო შტაბის დაკომპლექტებაც დაიწყება.
"ცხადია, რომ ჩემი კანდიდატურის თაობაზე გადაწყვეტილება მიღებულ იქნება ცესკო-ს მიერ. სარეგისტრაციოდ ჩემს კანდიდატურას ორშაბათს შევიტან და ცესკო მიიღებს გადაწყვეტილებას. მე კარგად შევისწავლე კონსტიტუცია და მე მგონი ყველას აქვს საშუალება კონსტიტუციის წაკითხვისა და ნახოს რამდენად მარტივია და რამდენად მარტივად შეუძლია ცესკო-მ კონსტიტუცია მხეველობაში მიიღოს. მე არც რამე დათმობას, არც გამოსწორებას, არც რომელიმე კანონის შეცვლას და არც ჩემზე გამოჭრილ რამე კანონს ვეძებ, არც გამონაკლისის და პრივილეგირებულ მდგომარეობაში ჩაყენების დაშვებას ვითხოვ, მე მხოლოდ კანონით დაწესებული რეგულაციების ბოლომდე შესრულებას ვითხოვ და ეს კიდევ ერთხელ ვიტყვი, არის ძალიან მარტივი,"- განაცხადა სალომე ზურაბიშვილმა.
