საქართველოს საგარეო საქმეთა მინისტრი მაია ფანჯიკიძე რუსეთის ფედერაციის პოლიტიკურ ხელმძღვანელობას 2010 წელს ძალის გამოუყენებლობის შესახებ საქართველო-რუსეთს შორის დადებული ხელშეკრულების შესრულებით გათვალისწინებული ვალდებულებების შესრულებისკენ მოუწოდებს.
ფანჯიკიძის თქმით, 2010 წელს საქართველოს პრეზიდენტის მიერ ხელმოწერლი კოკუმენტი 2012 წლის საპარლამენტო არჩევნების შედეგად მოსულმა ქვეყნის ახალმა ხელისუფლებამაც აღიარა და დოკუმენტით გათვალისწინებული ყველა პირობა დაცულია, ახლა კი იმის ჯერია, რომ აღნიშნული ხელშეკრულებით გათვალისწინებული პირობები რუსეთის ფედერაციამაც დაიცვას.
"სერგეი ლავროვის განცხადებაში აღსანიშნავია ერთი შენიშვნა, როცა ის ძალის არგამოყენების შეთანხმების შესახებ საუბრობს. ძალის არგამოყენების შეთანხმება ცეცხლის შეწყვეტის შეთანხმების შემადგენელი ნაწილია, რომელიც საქართველოსა და რუსეთს შორის 2008 წლის აგვისტოს ომის შემდეგ შედგა. სწორედ ამ შეთანხმების შესასრულებლად არის შექმნილი ჟენევის ფორმატი. მოგეხსენებათ, რომ ჟენევის ფორმატში ჩვენ ყოველთვის ვცდილობთ ძალის არგამოყენების შესახებ ვალდებულება რუსეთმა აიღოს, მასზე მიდის საუბარი და მუშაობა იქ პირველ ჯგუფში. ეს ვალდებულება საქართველოს ცალმხრივად აქვს აღებული, ეს 2010 წელს მოხდა, როდესაც მას ხელი მოაწერა საქართველოს პრეზიდენტმა. 2013 წელს კი უკვე ახალმა ხელისუფლებამ და პარლამენტმა ეს განცხადება გაიმეორა. შესაბამისად, ეს ცალმხრივად საქართველოს მხრიდან უკვე შესრულებულია და ახლა ჯერი რუსეთზეა, ამიტომ თუ რუსეთი იფიქრებს, რომ ეს აუცილებელია და ამ ვალდებულებას თავის თავზე აიღებს, ჩვენ ამას მხოლოდ მივესალმებით", - განაცხადა მაია ფანჯიკიძემ.
