საქართველოს საგარეოს საქმეთა მინისტრის მაია ფანჯიკიძის განცხადებით, "რუსეთის ფედერაციის საგარეო საქმეთა მინისტრმა სერგეი ლავროვმა აფხაზებთან და ოსებთან პირდაპირი დიალოგის დაწყების სურვილთან დაკავშირებით საქართველოს პრემიერ-მინისტრ ბიძინა ივანიშვილის განცხადება არასწორად გაიგო".
"რაც შეეხება ლავროვის კომენტარს იმის შესახებ, რომ იგი მიესალმება საქართველოს პირდაპირ დიალოგს აფხაზებთან და ოსებთან, მას როგორც ჩანს, არასწორად გაუგია პრემიერ-მინისტრის განცხადება, მისი კომენტარი ამ საკითხზე. იქ არ არის ლაპარაკი იმ კონტექსტზე, რომელსაც გულისხმობს ბატონი ლავროვი. იქ არის ლაპარაკი ქართველებსა და აფხაზებს, ქართველებსა და ოსებს შორის ნდობის აღდგენაზე. არის ლაპარაკი იმაზე, რომ ჩვენც უნდა ვაღიაროთ ჩევნი შეცდომები და უნდა ვეცადოთ, რომ ვიპოვოთ ერთმანეთისკენ მისასვლელი გზები. მხოლოდ ამის შემდეგ და ეკონომიკური წარმატების და ქვეყნის განვითარების პარალელურად, ჩეენ გვექნება იმის საშუალება, რომ ჩვენს აფხაზ და ოს ძმებს დავუდასტუროთ ის, რომ ჩვენ მათთან ერთად ცხოვრება გვინდა და დავსახოთ ერთიან ქვეყანაში ცხოვრების მომავალი. სწორედ ამაზე იყო პრემიერის განცხადებაში საუბარი და არა იმაზე, რომ საქართველო მათთან, როგორც დამოუკიდებელ სახელმწიფოებთან, ისე დაამყარებს პირდაპირ დიალოგს", - განაცხადა მაია ფანჯიკიძემ.
ცნობისთვის, რუსეთის ფედერაციის საგარეო საქმეთა მინისტრმა სერგეი ლავროვმა ე.წ. აფხაზეთის სახელმწიფო ტელერადიოკომპანიისთვის მიცემულ ინტერვიუში განაცხადა, რომ რუსეთი "აფხაზეთსა და სამხრეთ ოსეთთან" დიალოგის შესახებ საქართველოს ახალი ხელისუფლების განცხადებებს მიესალმება.
"რუსეთი მიესალმება საქართველოს ხელისუფლების განცხადებას აფხაზეთსა და სამხრეთ ოსეთთან ურთიერთობის აღდგენის შესაძლებლობისა და მათთან პირდაპირი დიალოგის მზადყოფნის შესახებ. დარწმუნებული ვარ, საბოლოოდ ყველა ჩვენგანის ინტერესებშია, უპირველესად კი, აფხაზების, ოსებისა და ქართველების ინტერესებშია, რომ ამ რეგიონში კეთილმეზობლური ურთიერთობები დამყარდეს. ჩვენ მივესალებით საქართველოს ხელისუფლების განცხადებებს და მივიჩნევთ, რომ თუ უბრალო ადამიანების ინტერესებიდან გამოვალთ, დავეხმარებით მათი ინტერესების განხორციელებაში, ყველა გეოპოლიტიკური ამბიცია გვერდზე დარჩება, მითუმეტეს, რომ ამ ამბიციებს, როგორც უკვე არაერთხელ აღვნიშნეთ, განხორციელება არ უწერია", - განაცხადა სერგეი ლავროვმა.
