საქართველოს პრეზიდენტი მიხეილ სააკაშვილი პრემიერ-მინისტრ ბიძინა ივანიშვილს მოუწოდებს მასთან ერთად, დაცვის თანამშრომლების მინიმალური რაოდენობით ან სულაც მათ გარეშე ხალხში, ქალაქების ქუჩებში გავიდეს და საზოგადოების პრობლემების და საჭიროებების შესახებ რეალური ინფორმაცია მიიღოს.
"მე თავისუფლად დავდივარ ჩემს ქუჩებში, ჩვენი ქალაქების ქუჩებში და მინდა იგივესკენ მოვუწოდო საქართველოს პრემიერ-მინისტრს. ზედმეტი თეორიები არ არის აქ საჭირო. აშკარად ვხედავ, რომ მას ინფორმაცია არ აქვს, არ არის საქმის კურსში კონკრეტულად რა ხდება საზოგადოებაში და მოვუწოდებ ჩემთან ერთად დაცვის თანამშრომელბის მინიმალურ გარემოცვაში და საერთოდ მათ გარეშე (მე პარობლემა არ მაქვს, მათ გარეშეც ვიარო), გავიდეთ ხალხში, ისე როგორც მე დავდივარ და დაველაპარაკოთ ხალხს. მისთვისაც ძალიან სასარგებლო იქნება და ქვეყანასაც ძალიან წაადგებოდა მისი ინფორმირებულობა,"- განაცხადა მიხეილ სააკაშვილმა.
ამასთან, პრეზიდენტმა ბათუმის პიაცაზე 2008 წლის აგვისტოს ომში დაღუპული სამხედრო მოსამსახურეების ოჯახის წევრებთან ერთად ივახშამა და ომში დაღუპული სამხედროების დამსახურებას გაუსვა ხაზი.
"ეს ყველფერი აშენდა 2008 წლის ომის შემდეგ, 1009-ში და 2011-ში. რასაც ხედავთ, მაღალ შენობებს, რესტავრირებულ ნაწილს. რომ არა ჩვენი ბიჭების თავდადება, თავგანწირვა და მსხვერპლი, საქართველო არა მხოლოდ ამას ვერ ააშენებდა, არამედ საერთოდ აღარ იქნებოდა. რას ნიშნავდა ის, რაც მათ გააკეთეს, შემდეგ თაობებს მუდმივად უნდა გადავცეთ. იმიტომ, რომ იმ დღეებში რომ არ შეგვეკავებინა, შემდეგ მსოფლიო რომ არ ჩართულიყო, შემდეგ ხალხი რომ არ დარაზმულიყო, შემდეგ მოღალატეები რომ არ გაჩუმებულიყვნენ და ხმა არ ჩაეკმინდათ, ჩვენ არაფერი ეს არ გვექნებოდა. ეს ყველაფერი არის იმის შედეგი, რომ საქართველო ჩვენმა სამხედრო მოსამსახურეებმა გადაარჩინეს. ეს არის ის, რისი თქმის გამეორებითაც არასოდეს დავიღლები და სკოლებში და ყველგან სულ უფრო მუდმივად უნდა ვასწავლოთ. ეს ყველაფერი ჰაერიდან არ მოდის. არც ერთ პოსტსაბჭოთა ქვეყანაში არსად მსგავსი რამ არ ხდება. ჩვენ გავბედეთ, რომ ჩვენი თავისუფლება დავიცავით, გავბედეთ, რომ დამოუკიდებელები ვიყავით, გავბედეთ, რომ მტრის ჯინაზე და მტრის ნების საწინააღმდეგოდ ეს ყველაფერი მაინც გაგვეკეთებინა. ჩვენს დამპყრობელ რუსეთს უნდოდა საქართველო სრულად განადგურებული, ჩამონგრეული და კუთხეში მიყენებული ყოფილიყო. ასეთი რამეები რუსეთს არ აქვს და ბევრი რუსი ჩამოდის და პირდაღებული უყურებს ამ ყველაფერს "ვა, რა მაგარი ქვეყანა გქონიათო". მთელი არსი ის არის, რომ მათ მთავრობას ეს არ უნდოდა,"- აღნიშნა სააკაშვილმა.
ცნობისთვის, საქართველოს პრეზიდენტის ინიციატივით, 2008 წლის აგვისტოს ომში მონაწილე სამხედრო მოსამსახურეების ოჯახის წევრები ეტაპობრივად ბობოყვათის რეზიდენციაში ისვენებენ. ქვეყნის პირველმა პირმა ისინი პიაცაზე სავახშმოდ მიიწვია. მიხეილ სააკაშვილმა პირველ ლედისთან ერთად ბულვარშიც გაისეირნა და იქ მყოფ ტურისტებს გაესაუბრა.