ბრიტანული გამოცემა The Independent საქართველო-დასავლეთს შორის ივანიშვილის ხელისუფლებაში მოსვლის შემდგომ ჩამოყალიბებულ ურთიერთობებს ეხმიანება. "საქართველოს ახალი ლიდერი დასავლეთს ანერვიულებს", - ასეთი ქვესათაურის სტატიას უძღვნის გამოცემა ივანიშვილის მთავრობის ქმედებების შედეგად განვითარებულ მოვლენებს.
სტატიის ავტორი ჯიმ არმიტიჯი საქართველოს მილიარდელი პრემიერმინისტრის მხრიდან წინდახედულობის გამოჩენის აუცილებლობაზე საუბრობს და აღნიშნავს, რომ სამშობლოში დაბრუნებამდე ბიძინა ივანიშვილმა ქონება რუსეთში დააგროვა.
ამასთან, არმიტიჯი ხაზს უსვამს იმას, რომ საქართველოში დაბრუნებული ივანიშვილის მიერ ჩამოყალიბებულმა კოალიციამ გამარჯვება პროდასავლური პრეზიდენტის, მიხეილ სააკაშვილის პარტიის დამარცხებით მოიპოვა.
ავტორი აზრით, დასავლელი ლიდერები შიშობენ იმას, რომ ივანიშვილს, რომელმაც ქონება რუსეთში მოღვაწეობის დროს დააგროვა, საქართველოს რუსულ ორბიტაზე დაბრუნება სურს.
"დასავლეთში, ხელისუფლებების ზოგიერთ წარმომადგენელი შიშობს, რომ ივანიშვილს ქვეყნის კვლავ, დედა-რუსეთში დაბრუნება სურს. მართალია, თავად აცხადებს, რომ აღმოსავლეთისა და დასავლეთის მეგობრობა და საქართველოს ევროკავშირსა და ნატო-ში გაწევრიანება სურს, მაგრამ მისმა ხელისუფლებამ კორუფციის ბრალდებით სააკაშვილის ხელისუფლების ათობით წარმომადგენელი დააპატიმრა", - აღნიშნულია სტატიაში.
აქვე ნათქვამია, რომ ბიძინა ივანიშვილი თავად პრეზიდენტის პასუხისგებაში მიცემასაც არ გამორიცხავს.
ჯიმ არმიტიჯი ყოფილი მაღალჩინოსნების დაკავებების გამო აშშ-ს მხრიდან ღიად გამოთქმულ შეშფოთებაზეც საუბრობს და აღნიშნავს, რომ თუ ბიძინა ივანიშვილს მართლაც სურს დასავლეთთან ურთიერთობის შენარჩუნება, მან უნდა შეწყვიტოს ოპონენტების გასაჩუმებლად პასუხისგებაში მიცემით დამუქრება.
როგორც არმიტაჯი წერს, მუქარის ტაქტიკა შესაძლოა, მოსკოვის საამებლად გამოდგეს, თუმცა დასავლეთს ამასთან მიმართებაში შესაძლოა სხვა დამოკიდებულება გააჩნდეს.
მასალის გამოყენების პირობები