"დღევანდელ მთავრობაში ირაკლი ალასანია ყველაზე ადექვატური მინისტრი და მთავრობის წევრია,"- ამის შესახებ საქართველოს პრეზიდენტმა მიხეილ სააკაშვილმა თავდაცვის მინისტრ ირაკლი ალასანიას მიერ ქვეყნის ევროატლანტიკური ინტეგრაციის კუთხით ყოფლი ხელისუფლებების დროს გადადგმული ნაბიჯების შეფასებისას გაკეთებული განცხადებების კომენტირებისას ისაუბრა.
"ალასანიას რომ არ ეთქვა, რომ ჩემმა მთავრობამ ბევრი რამ გააკეთა, ეს შეგიძლიათ გარეთ გახვიდეთ და ხალხს ჰკითხოთ და ყველა გეტყვით, რომ ჩვენმა მთავრობამ უფრო მეტი გააკეთა, ვიდრე ოდესმე გაკეთებულა. ის დღევანდელ მთავრობაში ნამდვილად არის ყველაზე ადექვატური მინისტრიც და მთავრობის წევრიც. ეს ნამდვილად ასეა და მე ვფიქრობ, ეს განცხადება ამას მხოლოდ ადასტურებს, მაგრამ მე ვფიქრობ, რომ ეს ადექვატურობა ნიშნავს იმას, რომ გარშემო ხალხი ზუსტად ასევე ფიქრობს", - განაცხადა მიხეილ სააკაშვილმა.
ცნობისთვის, საქართველოს თავდაცვის მინისტრმა ირაკლი ალასანიამ გამოცემა "ევრაზიანეტისთვის" მიცემულ ინტერვიუში საქართველოს წინა ხელისუფლებების დამსახურებების და ამჟამინდელი მთავრობის შეცდომების შესახებ საუბრისას აღნიშნა, რომ "პრეზიდენტმა სააკაშვილმა ქვეყნის მოდერნიზაციისთვის და ევტროინტეგრაციისთვის ძალისხმევა არ დაიშურა".
"ამჟამინდელი საქართველო წინა ხელისუფლებაში მყოფი უამრავი ადამიანის დიდი შრომის შედეგია. საქართველოს პირველმა პრეზიდენტმა ქვეყანას დამოუკიდებლობა მოუტანა. ედუარდ შევარდნაძე პირველი ლიდერი იყო, რომელმაც ნატო-სა და ევროკავშირში საქართველოს მომავალზე დაიწყო საუბარი. მესამე პრეზიდენტმა მიხეილ სააკაშვილმა კი, ძალისხმევა არ დაიშურა პროგრესის მისაღწევად და უამრავი ახალი ინიციატივა წამოიწყო საქართველოს მოდერნიზაციისა და ინტეგრაციისთვის. ჩვენ უნდა ვაღიაროთ და დავაფასოთ ეს ყველაფერი და წინა მთავრობების მიერ აგებულ მყარ ნიადაგზე წინსვლა გავაგრძელოთ,"- განაცხადა ირაკლი ალასანიამ.
რაც შეეხება ყოფილი ხელისუფლების მაღალჩინოსანთა წინააღმდეგ აღძრულ სისხლის სამართლის საქმეებს, ალასანიას თქმით, "საქართველოს ახალმა ხელისუფლებამ დაუშვა შეცდომები, რადგან 2012 წლის საპარლამენტო არჩევნების შემდეგ უამრავმა ემოციამ იფეთქა, თუმცა ახლა ყველაფერი ლაგდება".