"თამარ ჟვანიას არ ვიცნობ, მაგრამ თუ არასამთავრობოებმა მისი კანდიდატურა მოინდომეს, ალბათ უნდა ვენდო", - ამის შესახებ საქართველოს პრეზიდნტმა მიხეილ სააკაშვილმა არჩევნების თემატიკაზე საქართველოში მომუშავე 11 არასამთავრობო ორგანიზაციის მიერ ცენტრალური საარჩევნო კომისიის თავმჯდომარის პოსტზე გაეროს განვითარების პროგრამის პროექტის ხელმძღვანელის თამარ ჟვანიას კანდიდატურის წარდგენის ფაქტის კომენტირებისას ისაუბრა.
მისი თქმით, ცესკო-ს თავმჯდომარება მან ნინო ლომჯარიას, ეკა გიგაურს და კახა კოჟორიძეს შესთავაზა, თუმცა რადგან აღნიშნულმა პირებმა შეთავაზებულ წინადადების მიღებაზე უარი თქვეს და მათთვის სასურველი საერთო კანდიდატი წარმოადგინეს.
"საერთოდ არ ვიცნობ, ვინ არის თამარ ჟვანია. ცესკოს თავმჯდომარეობა მე შევთავაზე კოჟორიძეს, შევთავაზე ლომჯარიას და შევთავაზე გიგაურს. ახლა, რომ გითხრათ, რომ მზე და მთვარე ამომდის ამ სამ პიროვნებაზე, ასე არ არის. სიტყვაზე, ისინი მუდმივად გვაკრიტიკებდნენ და ძალიან ხშირად უსამართლოდ მე მაკრიტიკებდნენ. მაგრამ, მიმაჩნია, რომ იგივე ლომჯარია და იგივე გიგაური უბრალოდ არიან გულწრფელი, გულანთებული, ნორმალური ადამიანები. იმათ ასეთი შეხედულებები აქვთ, მე ასეთი შეხედულებები მაქვს, მაგრამ ამის გამო ისინი არ უნდა დაიჩაგრონ. ამიტომ შევთავაზე მათ. ძალიან მესიმპათიურება ეს ხალხი, მიმაჩნია, რომ თავისი ქვეყნისთვის კარგი რაღაცა უნდათ. ძირითადად, მათ ვიცნობ მხოლოდ ტელევიზორიდან. თუ თვითონ არ მოინდომეს და ვიღაც სხვა წარმოადგინეს, რომელსაც არ ვიცნობ, მე მათ მსჯელობას ალბათ უნდა ვენდო", - განაცხადა მიხეილ სააკაშვილმა.
ცნობისთვის, არჩევნების თემატიკაზე მომუშავე საქართველოში მოქმედმა 11-მა არასამთავრობო ორგანიზაციამ ცენტრალური საარჩევნო კომისიის თავმჯდომარის პოსტზე გაეროს განვითარების ფონდის საერთაშორსო პროექტების ხელმძღვანელის თამარ ჟვანიას კანდიდატურა ოფიციალურად წარადგინა.
როგორც ორგანიზაციების წარმომადგენლებმა დღეს გამართულ ერთობლივ ბრიფინგზე აღნიშნეს, მათ მიერ შერჩეული კანდიდატი საქართველოს პრეზიდენტს უახლოეს დღეებში წარედგინება.
არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოების" აღმასრულებელი დირექტორის ნინო ლომჯარიას განცხადებით, პრეზიდენტისთვის ცესკო-ს თავმჯდომარეობის კანდიდატად წარდგენილი თამარ ჟვანია არაპარტიული, აპოლიტიკური წარსულის მქონე და საარჩევნო ადმინისტრაციის საქმიანობისთვის საჭირო ცოდნის მატარებელია.
"თამარ ჟვანიას კანდიდატურის შერჩევის დროს ორგანიზაციებმა რამდენიმე კრიტერიუმი გავითვალისწინეთ. პირველ რიგში საარჩევნო საკითხებზე მუშაობის გამოცდილება როგორც ადგილობრივ, ასევე საერთშორისო ორგანიზაციებში. ძალიან მნიშვნელოვანი იყო ისიც, რომ თამარმა ძალიან კარგად იცის საარჩევნო ადმინისტრაციის საქმიანობა და მისი სპეციფიკა. რა თქმა უნდა, ასევე მნიშვნელოვანი იყო მისი აპოლიტიკური წარსული. ის არის ნეიტრალური ადამიანი და რა თქმა უნდა, პიროვნული თვისებები, ობიექტურობა და პრინციპულობა, რაც მას ახასიათებს, გადამწყვეტია. შესაბამისად, ვფიქრობთ, რომ თამარ ჟვანიას კანდიდატურა მისაღები იქნება როგორც პრეზიდენტისთვის, ასევე ცესკო-ში მმართველი კოალიციური პარტიის წარმომადგენლებისთვის, რომლებმაც მხარი უნდა დაუჭირონ კანდიდატს,"- განაცხადა ნინო ლომჯარიამ.
