"გაპრეზიდენტების შემთხვევაში, მავთულხლართებს კავკასიონის ქედზე გადავიტან,"- ამის შესახებ "ლეიბორისტული პარტიის" საპრეზიდენტო კანდიდატმა შალვა ნათელაშვილმა წინასაარჩევნო კამპანიის ფარგლებში შიდა ქართლის სოფელ ზემო ნიქოზის მოსახლეობასთან შეხვედრისას ისაუბრა.
ნათელაშვილი ადგილობრივი მოსახლეობის პრობლემებს და საჭიროებებს გაეცნო და 2013 წლის 27 ოქტომბრის საპრეზიდენტო არჩევნებში მისი გამარჯვების შემთხვევაში, მათ ამ პრობლემების მოგვარებას დაჰპირდა.
"ვპირდები მოსახლეობას, რომ როცა 27 ოქტომბრის შემდეგ პრეზიდენტის რანგში ჩამოვალ, უკვე კონკრეტულ საქმეებს გავაკეთებთ. მე დღეს ბოდიშს ვუხდი ამ ხალხს, რომ იმის გამო, რომ ძალაუფლება არ გვაქვს, კონკრეტულ საქმეებს ვერ ვაკეთებთ, გარდა იმისა, რომ ჩამოვუტანეთ გული და ეს გული მზად არის დაიწვას ნიქოზისთვის და საქართველოსთვის,"- განაცხადა შალვა ნათელაშვილმა.