"საქართველოს თავდაცვის მინისტრმა კიდევ ერთხელ დაადასტურა, რომ ქვეყანა აქტიურად მიიწევს ნატო-სკენ,"- ამის შესახებ "ჯეიმს თაუნის" ფონდის პრეზიდნტმა გლენ ჰოვარდმა ამერიკის შეერთებულ შტატებში გამართულ კონფერენციაზე სახელწოდებით "სამომავლო პარტნიორობა თავდაცვის სფეროში" ისაუბრა. .
"საქართველო უკვე იღებს მონაწილეობას ისეთ ოპერაციებში, როგორიც ავღანეთის მისიაა და ის ამ ფუნქციის შესრულებას მომავალშიც გააგრძელებს. ეს უმნიშვნელოვანესი ფაქტორია მისი ნატო-ში გაწევრიანების გზაზე,"- განაცხადა გლენ ჰოვარდმა.
აღნიშნულ კონფერენციაზე კომენტარი საქართველოს თავდაცვის მინისტრმა ირაკლი ალასანიამაც გააკეთა. მისი თქმით, "ამერიკის შეერთებული შტატები დაეხმარება საქართველოს, ადეკვატური თავდაცვის შესაძლებლობები შექმნას, რაც რეგიონში არსებულ საფრთხეებს უპასუხებს".
"ჩვენ ვისაუბრეთ იმაზე, რომ კიდევ უფრო გააღრმავებს ჩვენს მხარდაჭერას სამხედრო განათლების მიღების კუთხით. მე ასევე მივიღე ყველანაირი გარანტია იმისა, რომ საქართველოს დეოკუპაციის საკითხი, ტერიტორიული მთლიანობის საკითხი და ნატო-ში ინტეგრაციის საკითხი მუდმივად იქნება რუსეთ-აშშ-ის დიალოგის ნაწილი, ვიდრე რუსეთის ფედერაცია არ შეეგუება იმას, რომ მან უნდა გაიყვანოს თავისი ჯარები საქართველოს ტერიტორიიდან", - განაცხადა ირაკლი ალასანიამ.
