„ერთიანი ნაციონალური მოძრაობა" ქართულ მედიასივრცეში ბოლო დროს დაწყებული გადანაწილების პროცესთან დაკავშირებით განცხადებას ავრცელებს. „ჯი-ეიჩ-ენი" პარტიის მიერ გავრცელებულ განცხადებას გთავაზობთ უცვლელად:
„არანაირ ეჭვს არ იწვევს ის, რომ ქართულ მედიასივრცეში ბოლო დროს დაწყებული გადანაწილების პროცესის საბოლოო მიზანი მთელი მედიასივრცის პირადად ბიძინა ივანიშვილის სრულ კონტროლს დაქვემდებარებაა. ეს გასაკვირი არაა, რადგან ივანიშვილი, ამგვარ სურვილს პოლიტიკაში მოსვლის პირველივე დღიდან ავლენდა და გამოირჩეოდა უაღრესად აგრესიული რიტორიკით მისთვის მიუღებელი აზრის მქონე ჟურნალისტების მიმართ.
მე-9 არხის დახურვამ და ამის პარალელურად, მედიის სფეროში განვითარებულმა მოვლენებმა ცხადყო, რომ გადანაწილების ახალი სქემა უკვე შემუშავებულია. პრემიერ - მინისტრის განცხადება კი, თითქოს მე-9 არხის დახურვა მოსალოდნელი არჩევნების წინ ტელეკომპანიიდან მის დისტანცირებას უკავშირდება, არის უბრალოდ სიცრუე და საზოგადოებისთვის თვალში ნაცრის შეყრის მცდელობა.
ხელისუფლების მიერ შემუშავებული მედიის გადანაწილების სქემის ამოცანას ტელეკომპანია „იმედის" ხელოვნურად გაძლიერება და "რუსთავი 2"ის დასუსტება წარმოადგენს. ამას უკანასკნელი მოვლენებიც ცხადყოფს, კერძოდ:
- ტელეკომპანია „მაესტროს" ჟურნალისტები ორგანიზებულად გადაჰყავთ ტელეკომპანია „იმედში";
- პრემიერ-მინისტრის მრჩეველი, გია ხუხაშვილი ერთ-ერთ ინტერვიუში საკუთარ თავს უფლებას აძლევს, ისაუბროს ტელეკომპანია „იმედის" სახელით;
- იქვე ხუხაშვილი კრიტიკულად მიმოიხილავს „მაესტროს" სატელევიზიო ბადის დეტალებს;
- ჩვენი ინფორმაციით, ამ დღეებში განსაკუთრებული ინტენსივობით მიმდინარეობს ცალკეული ჟურნალისტების გადაბირების პროცესი „ხელისუფლების მიერ კონტროლირებად" ტელევიზიებში;
- საზოგადოებრივი მაუწყებელი, რომელიც ბოლო წლების განმავლობაში საქართველოში ყველაზე დაბალანსებულ მაუწყებლად საყოველთაოდ იყო აღიარებული, უკვე მყარად ექცევა "ქართული ოცნების" კონტროლქვეშ. ამას ევროკავშირის ეგიდით ჩატარებული მედიამონიტორინგი თვალნათლივ ცხადყოფს.
ქართული მედიასივრცის ამგვარი გადანაწილება მოწმობს იმას, რომ ბიძინა ივანიშვილს არ შეუცვლია თავისი დამოკიდებულება მედიის თავისუფლებისა და ჟურნალისტიკური დამოუკიდებლობის მიმართ. ეს ფაქტი განსაკუთრებით შემაშფოთებელია იმის გათვალისწინებით, რომ ის მხოლოდ მილიარდერი კი არა, არამედ ქვეყნის პრემიერ-მინისტრიცაა"- ნათქვამია განცხადებაში.