საქართველოს მთავრობამ ვაშინგტონში გავლენიან ლობისტურ და იურიდიულ კომპანია "Patton Boggs"-ს კონტრაქტი წლის ბოლომდე გაუხანგრძლივა.
აღნიშნულ კონტრაქტს ახალი პუნქტი დაემატა, რომელიც მედია კონსულტანტის დაქირავებას ითვალისწინებს.
საქართველოს მთავრობის კანცელარიის საგარეო ურთიერთობათა სამსახურის მრჩევლის დავით მაღრაძის განცხადებით, განახლებული დოკუმენტით კომპანია ყოველთვიურად გაზრდილ ანაზღაურებას, 110 000 ამერიკულ დოლარს მიიღებს.
"დაემატა მედია კომპონენტი მაგრამ აქ მხოლოდ მედია კომპონენტზე არ არის საუბარი, საუბარია საქართველოს ინტერესებისთვის და საქართველოში მიმდინარე პროცესების უფრო მკაფიო და ინტენსიური ინფორმაციის გატანაზე, რომელიც ამერიკის შეერთებულ შტატებში ყველა იმ დაინტერესებულ პირს, ან ყველა იმ პირს, ვინც დაინტერესებული უნდა იყოს, მიეწოდება,"- განაცხადა დავით მაღრაძემ.
ლობისტური კომპანია "Patton Boggs" საქართველოს მთავრობას ნატო-ს მისწრაფების მხარდაჭერის თვალსაზრისით, ამერიკის შეერთებული შტატების მთავრობასთან და კონგრესთან ურთიერთობის კუთხით ეხმარება. ამასთან, აღნიშნული კომპანია მედიასა და საზოგადოებრივი აზრის ფორმირებაში ჩართულ პირებთან ურთიერთობებს არეგულირებს და საქართველოს მთავრობას შესაბამისი ღონისძიებების და შეხვედრების მოწყობაში და საქართველოში მიმდინარე მოვლენების შესახებ ამერიკის შეერთებული შტატების ინფორმირებაში ეხმარება.
ცნობისთვის, ლობისტური კომპანია "Patton Boggs" 2012 წელს პირადად ბიძინა ივანიშვილმა დაიქირავა. კომპანია მაშინ კოალიცია "ქართული ოცნების" წინასაარჩევნო კამპანიაში იყო ჩართული.
