"მე წავიკითხე ბატონი ჰოპმარკის განცხადება და ძალიან თვალში მომხვდა ის, რომ იგი წინა არჩევნებს დემოკრატიის ჩაბარებულ ტესტს უწოდებს და ახლა განიცდის იმას, რომ თურმე ოპოზიციის წარმომადგენლები იდევნებიან. ეს მე მაფიქრებინებს იმას, რომ მას შარშანდელი არჩევნების წინ და მთელი იმ ერთწლიანი კამპანიის განმავლობაში არ ჰქონია ინფორმაცია იმის შესახებ თუ როგორ იდვნებოდა საქართველოში ოპოზიცია, რამდენი კაცი დაიჭირეს, რამდენმა დაკარგა სამსახური და რამდენმა დაკარგა ბიზნესი. მიუხედავად იმისა, რომ ჩვენ მცდლობას არ ვაკლებთ და ამ შემთხვევაში კოალიცია "ქართულ ოცნებას" ვგულისმობ, რომ საქართველოში მიმდინარე პროცესების შესახებ ინფორმაცია ჩვენი ევროპელი პარტნიორების ყურამდე მივიდეს, რატომღაც იგი ამ ინფორმაციის მიღმა დარჩენილა,"- განაცხადა მაია ფანჯიკიძემ.

ცნობისთვის, "ქართული ოცნება" რისკის ქვეშ აყენებს დემოკრატიას,"- ამ სათაურით ამერიკულმა გამოცემა "Wall Street Journal"-მა ევროპის სახალხო პარტიის ვიცე-პრეზიდენტის გუნარ ჰოპმარკის წერილი გამოაქვეყნა.

როგორც ჰოპმარკი სტატიაში აღნიშნავს, "ბიძინა ივანიშვილმა შეიძლება გააკრიტიკოს ოპოზიცია, მაგრამ ის ვერ უარყოფს, რომ ხელისუფლება მშვიდობიანად, დემოკრატიული არჩევნების ჩატარების შედგად ჩაიბარა და ეს შეუძლებელი იქნებოდა იმ პროგრესის გარეშე, რომელიც მიხეილ სააკაშვილის მმართველობისას იქნა მიღწეული, მაგრამ მიუხედავად ამისა, ახლა "ქართული ოცნების" ხელისუფლება მუქარის, ზეწოლის და ოპოზიციური პარტიის წარმომადგენელთა დაპატიმრებისთვის სამართლებრივ ინსტიტუციებს იყენებს".

აღნიშნული წერილით ევროპის სახალხო პარტიის ვიცე-პრეზიდენტმა "Wall Street Journal"-ში გამოქვეყნებულ ბიძინა ივანიშვილის სტატიას სათაურით - "პროგრესი პრაგმატიზმი გზით", უპასუხა.

გუნარ ჰოპმარკის წერილს საქართველოს უმაღლესი საკანონმდებლო ორგანოს თავმჯდომარის მოადგილე ზურაბ აბაშიძე გამოეხმაურა. მისი განცხადებით, ევროპის სახალხო პარტიის ვიცე-პრეზიდენტი "ნაციონალური მოძრაობის" აქტიური მხარდამჭერია და მისი შეფასებები მოულოდნელი არ ყოფილა.

"რა თქმა უნდა, მათ უჭირთ, იმიტომ, რომ მათივე შვილობილი პარტიები როდესაც არჩევნებს აგებენ, რაღაცა გარკვეულწილად განცდები და სენტიმენტები არსებობს,"- აღნიშნა აბაშიძემ.