საქართველოს საგარეო საქმეთა მინისტრის მაია ფანჯიკიძის განცხადებით, სანდრო გირგვლიანის საქმეში სამსახურებრივი უფლებამოსილების გადამეტებაში ბრალდებული იუსტიციის სამინისტროს გენერალური ინპექციის ყოფილი უფროსის მოადგილე დავით ჩხიტუნიძემ საბერძნეთში საქართველოს ელჩთან და კონსულთან შეხვედრა არ ისურვა.
"დავით ჩხიტუნიძემ არ ისურვა ელჩთან და კონსულთან შეხვედრა, თუმცა დროებითი დაკავების იზოლატორში ასეთი შეხვედრა მისი დაკავების დღეს მოხდა. რით არის გამოწვეული ის, რომ მან მეორედ შეხვედრა არ ისურვა, ვერ გეტყვით,"- განაცხადა მაია ფანჯიკიძემ.
რაც შეეხება ჩხიტუნიძის ჯანმრთელობის მდგომარეობას, ფანჯიკიძის თქმით, "ელჩი და კონსული საავადმყოფოს ხელმძღვანელობასთან იყვნენ და მიიღეს პასუხი, რომ დავით ჩხიტუნიძის ჯანმრთელობის მდგომარეობა დამაკმაყოფილებელია".
"მას ყველა გამოკვლევა ჩაუტარდა ტომოგრაფიულის ჩათვლით, მაგრამ მისი ჯანმრთელობის მდგომარეობის შესახებ ინფორმაცია, ჩხიტუნიძის სურვილის შესაბამისად, რომელსაც რასაკვირველია, ჩვენ პატივს ვცემთ, არ ხმაურდება. აქედან გამომდინარე ვფიქრობ, რომ საგარეო უწყება იჩენს იმ ყურადღებას, რომელიც მან უხოეთში დაკავებული საქართველოს მოქალაქის მიმართ უნდა გამოიჩინოს. შემდგომი პროცედურები უკვე უწყების კომპეტენციას სცილდება", - აღნიშნა ფანჯიკიძემ.
ამასთან, საგარეო საქმეთა მინისტრი ჩხიტუნიძის დიპლომატიური პასპორტის საკითხსაც შეეხო და განაცხადა, რომ დავით ჩხიტუნიძეს აღნიშნული დოკუმენტი იმიტომ ჰქონდა, რომ გარკვეული პერიოდის განმავლობაში იგი ერთ-ერთ დიპლომატიურ თანამდებობას იკავებდა და საქართველოს პრეზიდენტის მიერ გაცემული შესაბამისი ბრძანების საფუძველზე დიპლომატიური პასპორტის მქონე პირებს დოკუმენტის მოქმედების ვადა ერთი წლის ვადით გაუხანგრძლივდათ.
"ჩხიტუნიძისათვის დიპლომატიური პასპორტის მოქმედების ვადა საგარეო უწყებას არ შეუჩერებია. მას ჰქონდა დიპლომატიური პასპორტი, რადგან დიპლომატიურ თანამდებობაზე იმყოფებოდა, ხოლო თანამდებობიდან წასვლის შემდეგ, პრეზიდენტის ბრძანებულებით, რომელიც მან 1 ოქტომბრის არჩევნების შემდეგ გამოსცა, ყველას, ვისაც ჰქონდა დიპლომატიური პასპორტი, მათი მოქმედების ვადა 1 წლის გაუხანგრძლივდათ, მათ შორის, დავით ჩხიტუნიძესაც. ჩხიტუნიძე დაკავებული იყო სწორედ იმის გამო, რომ იძებნებოდა და "საგარეო საქმეთა სამინისტროს ამ მიმართულებით არანაირი შეხება არ აქვს".
შეგახსენებთ, რომ საქართველოს იუსტიციის სამინისტროს გენერალური ინსპექციის ყოფილი უფროსის მოადგილე დავით ჩხიტუნიძე 2013 წლის 13 აგვისტოს საბერძნეთის დედაქალაქ ათენში დააკავეს.
