კობა დავითაშვილმა პრეზიდენტობის კანდიდატად დაფიქსირების თაობაზე ცესკო-ში განაცხადი დღეს შეიტანა.
"ხალხის პარტიის" ლიდერმა 17 სექტემბრამდე ცენტრალურ საარჩევნო კომისიაში 25 000-მდე ადამიანის ხელმოწერაც უნდა წარადგინოს.
"27 ოქტომბრის საპრეზიდენტო არჩევნები ეს არ არის ჩვეულებრივი არჩევნები, ეს არის რეფერენდუმი შემდეგ შეკითხვაზე - სააკაშვილს და მის ჯალათებს რა?. აი ეს არის შეკითხვა რეფერენდუმზე და ამ კითხვაზე პასუხის გაცემა თითოეული მოქალაქის ვალია. მიმაჩნია, რომ უნდა დასრულდეს თავზე ხელის გადასმა, შერჩევითი სამართალი და სააკაშვილის ჯალათების მიმართ ლოიალობა,"- განაცხადა კობა დავითაშვილმა.
ამ დროისთვის საარჩევნო ადმინისტრაციაში პრეზიდენტობის მსურველი 33 კანდიდატის განაცხადია შესული. აქედან - 6 პოლიტიკური პარტიის წარმოადგენელია, 27 კი, საინიციატივო ჯგუფის.
ცესკო-ს ინფორმაციით, 2 კანდიდატი - პარტია "სამართლიანობის აღდგენის კავშირი ხმა ერისა - უფალია ჩვენი სიმართლეს" პრეზიდენტობის კანდიდატი მიხეილ-გელა სალუაშვილი და "ლეიბორისტული პარტიის" ლიდერი შალვა ნათელაშვილი პრეზიდენტობის კანდიდატებად უკვე დაარეგისტრირდნენ, რადგან მათ დარეგისტრირებისთვის საჭირო რაოდენობის მხარდამჭერთა ხელმოწერები უკვე აქვთ.