საქართველოს უმაღლესი საკანონმდებლო ორგანოს თავმჯდომარის მოადგილის ზურაბ აბაშიძის განცხადებით, პარტია "დემოკრატიული საქართველოს" პრეზიდენტობის კანდიდატმა ნინო ბურჯანაძემ კოალიცია "ქართული ოცნების" წინააღმდეგ ბინძური პოლიტიკური კამპანია წამოიწყო.
"თავისუფალი დემოკრატების" წარმომადგენლის თქმით, "ნინო ბურჯანაძის მიერ წამოწყებული კამპანია სათავეს "ნაციონალურ მოძრაობაში" იღებს, რადგან იგი წლების განმავლობაში ამ პარტიის "ღირსეული" წარმომადგენელი იყო".
"მის მიერ ბოლო დღეებში გავრცელებული ინფორმაცია, რომ თითქოს "თავისუფალი დემოკრატების" წევრები ბურჯანაძის პარტიაში გადადიან, სიმართლეს არ შეესაბამება. მსგავსი ფაქტი არც ერთ რეგიონში არ მომხდარა და ეს კამპანია სათავეს "ნაციონალურ მოძრაობაში" იღებს, რომლის "ღირსეული" წარმოამადგენელიც წლების წინ ნინო ბურჯანაძე იყო. აქედან გამომდინარე, ის ამ ტიპის მუშაობას აგრძელებს. კიდევ ერთხელ ვიტყვი, ძალიან ღრმად ვარ დარწმუნებული, რომ ჩვენი კანდიდატი გიორგი მარგელაშვილი ამ არჩევნებში აუცილებლად ძალიან დამაჯერებლად გაიმარჯვებს,"- განაცხადა ზურაბ აბაშიძემ.