საქართველოს პრეზიდენტის ადმინისტრაცია შეწყალების დოკუმენტის ძალაში შესვლამდე პრობაციონერებს კანონით დაკისრებული ვალდებულებების დაცვისკენ მოუწოდებს.
ინდივიდუალური აქტის საფუძველზე შეწყალების კომისიის მდივნის ნინო კალანდაძის განცხადებით, მოქალაქეებს ნასამართლეობა და პრობაციონერის ვალდებულებები შესაბამის დოკუმენტზე პრეზიდენტ მიხეილ სააკაშვილის ხელმოწერამდე არ ეხსნებათ, ამიტომ ყველა მათგანმა პრობაციის ბიუროს კანონმდებლობით გათვალისწინებული ყველა პირობა უნდა დაიცვას.
"პრეზიდენტის შეწყალების აქტი სამართლებრივად ძალაში მხოლოდ და მხოლოდ მას შემდეგ შედის, რაც მას ხელს მოაწერს საქართველოს პრეზიდენტი. შესაბამისად, ვიდრე ეს განცხადებები და შეწყალების აქტი ფორმალურად ხელმოწერილი არ იქნება, პირი სამართლებრივად შეწყალებულად არ ითვლება. შესაბამისად, ყველა პრობაციონერს მოეთხოვება კანონმდებლობით დადგენილი წესი და ვალდებულებები, რომლებიც მას აქამდე ეკისრებოდა, დაიცვას,"- განაცხადა ნინო კალანდაძემ.
საქართველოს პრეზიდენტის ადმინისტრაციის ხელმძღვანელის ანდრო ბარნოვის განცხადებით, შეწყალების მსურველთა დიდი რაოდნობის გამო, პრეზიდენტის ავლაბრის რეზიდენციის მიმდებარე ტერიტორიაზე განთავსებული შესაბამისი კარვების გაფართოვება და მოქალაქეებისთვის გაცილებით კომფორტული გარემოს შექმნა მოხდა.
"ინტერესი ძალიან დიდია, ძალიან ბევრი მოქალაქე მოგვმართავს. გუშინ 1 200 განცხადება მივიღეთ, 1 000-მდე სატელეფონო ზარი დაფიქსირდა. დღეს უკვე სულ რაღაც საათნახევრის დაწყბულია რეგისტრაცია და 200-ზე მეტი განცხადება უკვე მიღებულია. მოქალაქეებისთვის პროცესი უფრო კომფორტული რომ ყოფილიყო, რაღაც ცვლილებები შევიტანეთ და ვფიქრობ, ძალიან ფორმალურ გარემოში და კარგად მიდის ყველაფერი,"- განაცხადა ანდრო ბარნოვმა.
პრეზიდენტის მიერ გამოცხადებული შეწყალების თაობაზე განაცხადების მიღების პროცესი ყოველდღიურად დილის 10:00 საათიდან 18:00 საათამდე გაგრძელდება. ყველა განცხადი ინდივიდუალურად განიხილება, რის შემდეგაც, განმცხადებლებს შესაბამისი კომისიის საბოლოო გადაწყვეტილება ეცნობებათ .