სახელი და გვარი, ვინც "იმედი" დახურა, არის გიორგი თარგამაძე, -ამის შესახებ საქართველოს პრეზიდენტმა მიხეილ სააკაშვილმა დღეს მედიასთან გამართულ შეხვედრაზე განაცხადა.
"მას შემდეგ, რაც ბადრი პატარკაციშვილმა სცადა სახელმწიფო გადატრიალება და გამოვიდა ღია ეთერში, "იმედის" კოლექტივმა დახურა ტელევიზია. ეს მოხდა მას შემდეგ, რაც აღმოჩნდა, რომ რუსების დავალებით თქვენი მაშინდელი მფლობელი აკეთებდა სახელმწიფო გადატრიალებას, კლავდა შს მინისტრს და აპირებდა რაღაცას პრეზიდენტზე", - აღნიშნა სააკაშვილმა.
მისივე თქმით, "მე-9 არხი" კი პრემიერმა ბიძინა ივანიშვილმა დახურა.
"ვინ დახურა "მეცხრე არხი"? აბა, გამოიცანით. მე დავხურე? "მე-9 არხმა" გაუშვა ფილმი პუტინზე, დაურეკეს "მე-9 არხის" მფლობელს და ხომ არ იცით მისი სახელი და გვარი, ეს არის საქართველოს პრემიერ-მინისტრი. დახურა არხი მოსკოვიდან დარეკვით. თუ გინდათ სიმართლე, მე იქ ვიყავი და ვიცი. მივყვეთ ისტორიას? "25-ე არხი" გაიფურჩქნა ჩემი მთავრობის დროს და პოპულარული იყო. მე არ ვიცი, ვინ რა პრობლემები შეუქმნა. ძალიან კარგად ვიცი, რომ ბათუმში ერთ-ერთი მთავარი არხი იყო "25-ე არხი", - განაცხადა პრეზიდენტმა.
მისივე თქმით, საზოგადოება თვითონ ჩაება კლიშეებში და იძახის, პრეზიდენტმა რაღაც დახურაო.