"პარლამენტის მიერ გამოცხადებული ამნისტიით გათავისუფლებული პატიმრების გაშვების მოტივაცია გამოძიებული უნდა იყოს რადგან იქ კორუფციულ გარიგებებს ჰქონდა ადგილი, "- ამის შესახებ საქართველოს პრეზიდენტმა მიხეილ სააკაშვილმა საგანგებო ბრიფინგზე განაცხადა.
პრეზიდენტის თქმით, მის მიერ ყოფილი მსჯავრდებულების ნაწილისთვის ნასამართლეობის და პირობითი სასჯელის მოხსნის თაობაზე გამოცემულ აქტს "ამას არაფერი აქვს საერთო 2012 წლის დეკემბერში გამოცხადებულ დაუსაბუთებელ ამნისტიასთან.
"ამ აქტს არაფერი აქვს საერთო იმ დაუსაბუთებელ ამნისტიასთან, რომელიც გააკეთა საქართველოს პარლამენტმა. პირდაპირ რომ ვთქვათ - პოლიტიკური მოსაზრებებით და ზოგჯერ, წინა მთავრობის ჯინაზე, ჩემს ჯინაზე, როცა ათასობით ადამიანი, რომელიც არ უნდა იყოს გარეთ, გაუშვა, ზოგიერთს კი ე.წ. პოლიტპატიმრის სტატუსის მინიჭებით საერთოდ მიანიჭა სრული იმუნიტეტი. ეს ხალხი დღეს საფრთხეს უქმნის საზოგადოებას. მე ვფიქრობ, მათი გაშვების მოტივაცია უნდა იყოს გამოძიებული, რადგან იქ იყო კორუფციული მოტივაცია და ამის შესახებ საზოგადოებამ კარგად იცის, თუ როგორ ხდებოდა ამ ყველაფრის ჩაწყობა და გაკეთება, ნეპოტისტურად და მათ შორის, პირდაპირი კორუფციული გარიგებების გზით. მაგრამ ის, რასაც ჩვენ ვაკეთებთ ახლა, არის სრულიად გამჭვირვალე", - განაცხადა მიხეილ სააკაშვილმა.
ცნობისთვის, საქართველოს პრეზიდენტის მიხეილ სააკაშვილის გადაწყვეტილებით, ნასამართლეობის და პირობითი სასჯელის მქონე პირთა ნაწილს ნასამართლეობა ინდივიდუალური აქტით მოეხსნებათ.
როგორც პრეზიდენტის ადმინისტრაციის მიერ გავრცელებულ განცხადებაშია აღნიშნული, "ფერისცვალების დღესასწაულთან დაკავშირებით, საქართველოს პრეზიდენტმა მიიღო გადაწყვეტილება, რომ საპრეზიდენტო ვადის ამოწურვამდე კიდევ ერთი ძლიერი ნაბიჯი გადადგას ჩვენი საზოგადოების განახლებისა და გაჯანსაღების მიმართულებით".
საქართველოს პრეზიდენტის შესაბამისი აქტი არ შეეხებათ პირებს, რომლებსაც ჩადენილი აქვთ დანაშაული სახელმწიფოს ან კაცობრიობის წინააღმდეგ, ასევე მათ, ვინც გასამართლებულია პედოფილიის ან განზრახ მკვლელობის საფუძველზე.
აღნიშნული აქტი არ შეეხებათ პირებს, რომლებიც გასამართდნენ შემდეგი მუხლების მიხედვით:
მუხ. 108 - განზრახ მკვლელობა;
მუხ. 109 - განზრახ მკვლელობა დამამძიმებელ გარემოებებში;
მუხ. 112 - დედის მიერ ახალშობილის განზრახ მკვლელობა;
მუხ. 140 - სქესობრივი კავშირი ან სექსუალური ხასიათის სხვაგვარი მოქმედება 16 წლის ასაკს მიუღწეველთან;
მუხ. 1431 - ადამიანით ვაჭრობა (ტრეფიკინგი);
მუხ. 1432 - არასრულწლოვანით ვაჭრობა (ტრეფიკინგი);
მუხ. 1433 - ადამიანით ვაჭრობის (ტრეფიკინგის) მსხვერპლის (დაზარალებულის) მომსახურებით სარგებლობა;
მუხ. 1441 - წამება;
მუხ. 2231 - ქურდული სამყაროს წევრობა, კანონიერი ქურდობა;
მუხ. 229 - აფეთქება;
მუხ. 232 - ბირთვული იარაღის ან სხვა ბირთვული ასაფეთქებელი მოწყობილობის დამზადება;
მუხ. 234 - საქართველოს ტერიტორიაზე რადიაქტიული, ტოქსიკური, სამრეწველო ან საყოფაცხოვრებო ნარჩენის ტრანზიტი ან იმპორტი;
მუხ. 2551 - არასრულწლოვანის ჩაბმა პორნოგრაფიული ნაწარმოების ან სხვა საგნის უკანონო დამზადებასა და გასაღებაში;
ნასამართლეობის მოხნა არ შეეხებათ სსსკ - ის მე-11 კარის (დანაშაული სახელმწიფოს წინააღმდეგ) - XXXVII, XXXVII1 და XXXVIII თავებით გათვალისწინებული დანაშაულისათვის გასამართლებულ პირებს.
ნასამართლეობის მოხსნა ასევე არ შეეხებათ სსსკ მე-14 კარით (დანაშაული კაცობრიობის წინააღმდეგ) გასამართლებულ პირებს.
