"მე ვფიქრობ, დანაშაულის ზრდას შეუწყო ხელი არა მხოლოდ ამნისტიამ, არამედ იმ მოუთმენლობის, სიძულვილის ენამ, რომელიც გაბატონებულია ჩვენს საზოგადოებაში, შურისძიების ენამ, მიქსევების ენამ, რევანშიზმის ენამ, რამაც საბოლოო ჯამში, შექმნა ის ატმოსფერო, როდესაც ნორმალურია ძალადობის გამოყენება, რევანშის აღება პოლიტიკური თუ რაიმე სხვა ნიშნით,"- ამის შესახებ საქართველოს პრეზიდენტმა მიხეილ სააკა[ილმა დღეს გამართულ საგანგებო ბრიფინგზე განაცხადა.
მისი თქმით, "საზოგადოების დაცულობა არის მთავარი და საზოგადოების გაჯანსაღება არის ამის შემადგენელი ნაწილი".
ამასთან, პრეზიდენტი სამართალდამცველებს ეფექტური, შედეგიანი მუშაობისა და დანაშაულთან ბრძოლის გააქტიურებისკენ მოუწოდებს.
"ქედს ვიხრი ჩვენი პოლიციელების პროფესიონალიზმის წინაშე, მაგრამ მინდა, ვთქვა, რომ დღეს, სამწუხაროდ, საქართველოს პოლიციაში - და პოლიციელებმა კარგად იციან, რაზეც ვსაუბრობ, შეიმჩნევა დემორალიზაციის ნიშნები; შეიმჩნევა ნიშნები, რომ დეპროფესიონალიზაციის რაღაც ახალი კერები გაჩნდა. ვფიქრობ, ესეც დროებითი მოვლენაა. ჩვენ უნდა დავუბრუნდეთ იმ ტრადიციებს, რომელიც შეიქნა ბოლო წლებში, როცა წლებთან ერთად ბევრი ნეგატიური აღმოიფხვრა, რაღაცეები დარჩა და ეს კიდევ უნდა გამოსწორდეს, მაგრამ ძალიან ბევრი დადებითი შეიქმნა და საზოგადოება იყო დაცული. საზოგადოების დაცულობა არის მთავარი და საზოგადოების გაჯანსაღება არის ამის შემადგენელი ნაწილი. მოვუწოდებ ჩვენს სამართალდამცავ ორგანოებს, გააქტიურონ ბრძოლა დანაშაულთან. ახლა ჩამოვედი ბათუმიდან, სადაც რამდენიმე გახმაურებული მკვლელობა მოხდა თუნდაც ბოლო დღეებში. ქალაქში, რომელიც ადრე იყო მშვიდი და წყნარი. მე არ ვამბობ, რომ წინა მთავრობის დროს არ იყო დანაშაულები, მაგრამ ამ მასშტაბის მიახლოებითაც კი არ ყოფილა. ფაქტია, რომ ასეთი კლიმატი ბოლო დღეებში ხელოვნურად გაღვივდა. ფაქტია, რომ ეკონომიკური მდგომარეობა ქვეყანაში გაუარესდა და ესეც არ უწყობს ხელს დანაშაულის შემცირებას. ფაქტია, რომ რესოციალიზაციის პროგრამები ბევრად უკეთესად უნდა ამუშავდეს, თუმცა ამ კუთხით ჩვენ ბევრად დიდი გამოცდილება გვაქვს დაგროვილი, ჩვენ სისტემაში გვყავს ბევრი გამოცდილი კადრი", - განაცხადა მიხეილ სააკაშვილმა.