"დღეს ხალხს შესთავაზეს ისეთი კანდიდატები, რომლებიც უფრო დაბლა დგანან, ვიდრე ჩვენი ხალხის განვითარების და ღირსების დონეა,"- ამის შესახებ საქართველოს პრეზიდენტმა მიხეილ სააკაშვილმა დღეს ბათუმში ახლადგახსნილი საბაგირო გზის დასათვალიერებლად მისვლისას კოალიცია "ქართული ოცნების" მიერ საპრეზიდენტო კანდიდატად გიორგი მარგველაშვილის წარდგენის ფაქტის კომენტირებისას ჟურნალისტებთან საუბრისას განაცხადა.
პრეზიდენტის თქმით, "ერთ-ერთი რომაელი იმპერატორის მსგავსად, რომელმაც სენატში ცხენი აირჩია, ამას ქართველი ხალხი არ გააკეთებს, რადგან ელემენტარულად უხერხულია, ისეთი კანდიდატი შესთავაზეს".
"ქართველი ხალხი ბევრად უფრო ბრძენია, ვიდრე ვინმეს წარმოუდგენია. ხალხს უნდა მოვეპყრათ დიდი პატივისცემით. აქედან გამომდინარე, მე დარწმუნებული ვარ, რომ ზოგიერთისთვის მოულოდნელად, ალბათ, ხალხი მიიღებს გადაწყვეტილებას, რაც შეესაბამება მათ პირდაპირ წარმოდგენებს იმაზე, თუ როგორი უნდა იყოს მათ მიერ არჩეული, თუნდაც ახალი ფუნქციების პირობებში პრეზიდენტი", - განაცხადა მიხეილ სააკაშვილმა.
