ადვოკატი ქართლოს ღარიბაშვილი უკვე მეხუთედ, 2013 წლის 27 ოქტომბერს დაგეგმილ საპრეზიდენტო არჩევნებშიც მიიღებს მონაწილეობას.
მისი თქმით, იგი აღნიშნულთან დაკავშირებით ოფიციალურ განაცხადს ცენტრალურ საარჩევნო კომისიაში ხვალ შეიტანს.
"ჩემი წინასაარჩევნო პროგრამა სასამართლო სისტემაზე იქნება აქცენტირებული. ყველამ კარგად იცის, რომ მე ამაში კონკურენტი არ მყავს. თუ ადვოკატი ღარიბაშვილის და ბიზნესმენ პრემიერ-მინისტრ ივანიშვილის ტანდემი შედგა, შესაბამისად, იგი ეკონომიკას მიხედავს, მაგაში კარგად ერკვევა. რაც შეეხება სასამართლო სისტემას და სახელისუფლებო სტრუქტურებს, ამას მე მივხედავ. რაც შეეხება კონკურენტებს, აბა რა გითხრათ, ყველა კარგი ბიჭები და გოგონები არიან. ის, რომ მათ პრეზიდენტობა მოინდომეს და საქართველოს ლიდერობა უნდათ, უკვე კარგია,"- განაცხადა ქართლოს ღარიბაშვილმა.
შეგახსენებთ, რომ 1995 წლიდან მოყოლებული, ადვოკატი ქართლოს ღარიბაშვილი საქართველოში ჩატარებულ ყველა საპრეზიდენტო არჩევნებში მონაწილეობდა.