პრეზიდენტ მიხეილ სააკაშვლის განცხადებით, საქართველოში ყველაზე მეტი მედიასაშუალება მისი პრეზიდენტობის პერიოდში გაიხსნა.
"რაც მეტი იქნება, მით მეტი საშუალება ექნება ადამიანს, მიიღოს თუნდაც არასწორი ინფორმაცია. მერე, ბევრ არასწორი ინფორმაციას რომ შეადარებს, სწორი ინფორმაცია გამოუვა", - ამის შესახებ საქართველოს პრეზიდენტმა მიხეილ სააკაშვილმა ტელეკომპანია "მეცხრე არხის" შესაძლო დახურვის კომენტირებისას ისაუბრა.
მისი თქმით, "საქართველოში რაც მეტი არხი იქნება, იგი მით უფრო ბედნიერი იქნება, რადგან სწორედ მისი პრეზიდენტობის დროს გაიხსნა ყველაზე მეტი არხი".
"ჩემს დროს გაიხსნა "მეცხრე არხი", ჩემს დროს გაიხსნა "მაესტრო", როგორც პოლიტიკური მაუწყებელი, ჩემს დროს გაიხსნა "25-ე არხი", ისევე, როგრც არაერთი რეგიონალური მაუწყებელი, ასევე, ასობით ახალი გაზეთი. ასე რომ, ჩვენ დროს, მიუხედავად იმისა, ვინ რას ლაპარაკობდა, იხსნებოდა ტელევიზიები და უამრავი გაზეთი. მე რომ გავხდი პრეზიდენტი, საქართველოში იყო რეალურად 3 არხი - "იმედი, "რუსთავი 2" და "პირველი არხი". ახლა არის რამდენიმე ათეული. რაც მეტი იქნება, მით მეტი საშუალება ექნება ადამიანს, მიიღოს თუნდაც არასწორი ინფორმაცია. მერე, ბევრ არასწორი ინფორმაციას რომ შეადარებს, სწორი ინფორმაცია გამოუვა", - განაცხადა მიხეილ სააკაშვილმა.
ცნობისთვის, გავრცელებული ინფორმაციით, საქართველოს პრემიერ-მინისტრის ოჯახის საკუთრებაში არსებული ტელეკომპანია "მეცხრე არხი" და საინფორმაციო სააგენტო "ინფო 9" პირველი სექტემბრიდან იხურება.