"ხელიდან გავუშვით ისტორიული შანსი საქართველოში მსოფლიოს საუკეთესო სტანდარტის განათლების და ტექნოლოგიების ცენტრის შექმნის და არა მგონია, ეს მხოლოდ ჩემი პირადი მარცხი იყოს", აღნიშნულის შესახებ განცხადებას საქართველოს პრეზიდენტი აკეთებს. სააკაშვილის განმარტებით, ტექნოლოგიური უნივერსიტეტის მშენებლობა 2013 წლის გაზაფხულზე უნდა დასრულებულიყო, ხოლო სექტემბერში სტუდენტებიც უნდა მიეღო.
„ბათუმის ამერიკული ტექნოლოგიური უნივერსიტეტის მშენებლობის საბოლოო დასრულება გათვალისწინებული იყო 2013 წლის გაზაფხულზე და პირველი სტუდენტები მას წელს სექტემბერში უნდა მიეღო. ეს იქნებოდა პირველი სრულფასოვანი ამერიკული უნივერსიტეტი აღმოსავლეთ ევროპაში და პოსტსაბჭოთა სივრცეზე. სამწუხაროდ, უნივერსიტეტის მშენებლობა შეჩერდა, ხოლო ამერიკის მთავრობის დაფინანსება, ქართული მხარის ინიციატივით, სხვა პროექტებზე გადამისამართდა, მთავრობამ კი განაცხადა, რომ ამ შენობაში საერთოდ არ განთავსდება უნივერსიტეტი.
ამ ეტაპზე ჩვენ ხელიდან გავუშვით ისტორიული შანსი საქართველოში მსოფლიოს საუკეთესო სტანდარტის განათლების და ტექნოლოგიების ცენტრის შექმნის და არა მგონია, ეს მხოლოდ ჩემი პირადი მარცხი იყოს"- აცხადებს საქართველოს პრეზიდენტი.
შეგახსენებთ, რომ აჭარის მთავრობის გადაწყვეტილებით, ტექნოლოგიური უნივერსიტეტის შენობაში ბიზნესცენტრი უნდა განთავსდეს, თუმცა ამისათვის კი სახელმწიფომ შენობა კერძო ინვესტორს უნდა გადასცეს.
მასალის გამოყენების პირობები