კოალიცია "ქართული ოცნების" საპრეზიდენტო კანდიდატ გიორგი მარგველაშვილის ოფიციალური წარმომადგენელი ცენტრალურ საარჩევნო კომისიაში ირინა იმერლიშვილი საჯარო მოხელეებს წინასაარჩევნო კამპანიაში ჩართვისგან თავშეკავებისკენ მოუწოდებს.
როგორც მან დღეს გამართულ ბრიფინგზე განაცხადა, „საარჩევნო პროცესი ინტენსიურ ფაზაში შედის და საპრეზიდენტო კანდიდატი გიორგი მარგველაშვილი ყოველდღიურ რეჟიმში ხვდება რაიონებში მოსახლეობას".
ამასთან, იმერლიშვილი განმარტავს, თუ ვის აქვს და ვის არა უფლება, საარჩევნო კამპანიაში მიიღოს მონაწილეობა, რათა ადმინისტრაციული რესურსის გამოყენებაზე კითხვები არ გაჩნდეს.
"ყველას გასაგონად მინდა, ვთქვა, რომ კამპანიაში მონაწილეობის მიღების უფლება აქვთ პარლამენტის წევრებს, პრემიერ-მინისტრს, მინისტრებს, მათ მოადგილეებს, აფხაზეთისა და აჭარის უმაღლესი საბჭოების წარმომადგენლებს, აგრეთვე მათი მთავრობის თავმჯდომარეებს, საკრებულოს წევრებს, გამგებლებს, მერებს, გუბერნატორებს და საქართველოს პრეზიდენტს. აღნიშნულ პირებს, საარჩევნო კოდექსის თანახმად, უფლება არ აქვთ, აგიტაციაში ჩართონ მათ დაქვემდებარებაში მყოფი პირები, აგრეთვე არ აქვთ უფლება, გამოიყენონ სახელმწიფო ავტომანქანა, საწვავი, გარდა იმ თანამდებობის პირებისა, რომლებსაც ემსახურება სახელმწიფო დაცვა" - განაცხადა ირინა იმერლიშვილმა
დეპუტატი ყველა დანარჩენ საჯარო მოხელეს მოუწოდებს, „მაქსიმალურად შეიკავონ თავი საპრეზიდენტო კანდიდატთან შეხვედრაზე მისვლისაგან, ასევე აგიტაციის გაწევისგან".
"აგიტაციაში მონაწილეობის უფლება მათ აქვთ მხოლოდ იმ შემთხვევაში, თუ იმყოფებიან შვებულებაში, ან არის არასამუშაო საათები. აგიტაციაში მონაწილეობის მიღება სრულად ეკრძალებათ საარჩევნო კომისიის წევრებს, მოსამართლეებს, შსს-ს, თავდაცვის სამინისტროს, პროკურატურის, დაზვერვისა და სახელმწიფო დაცვის სპეციალური სამსახურის თანამშრომლებს, გენერალურ აუდიტორს, სახალხო დამცველს და დამოუკიდებელი მარეგულირებელი კომისიის წევრებს,"- აღნიშნა იმერლიშვილმა.