"ნაციონალურ მოძრაობაში" ხარატიშვილის სამომავლო გეგმების შესახებ არავინ არაფერი იცოდა და შესაბამისად, ჩვენსკენ ხელის გამოშვერა გაუგებარია,"- ასე გამოეხმაურა საქართველოს უმაღლესი საკანონმდებლო ორგანოს უმცირესობის წევრი მიხეილ მაჭავარიანი ცენტრალური საარჩევნო კომისიის ყოფილი თავმჯდომარის მიერ გაკეთებულ განცხადებას, რომლის თანახმად, ხარატიშვილმა თანამდებობიდან წასვლის და პოლიტიკური მოღვაწეობის დაწყების თაობაზე მიღებული გადაწყვეტილება უმაღლესი პოლიტიკური თანამდებობის პირებს წინასწარ გააცნო.
"ზურაბ ხარატიშვილმა ორი ძალიან კარგი არჩევნები ჩაატარა - ადგილობრივი და საპარლამენტო და საპრეზიდენტო არჩევნების ჩატარების შემდეგ, მას მე მგონი უფრო მეტი პოლიტიკური ზურგი ექნებოდა. ეს მისი გადასაწყვეტია. ძალიან სამწუხაროა, რომ ასეთი გადაწყვეტილება მიიღო. ჩვენ მოვისმინეთ, რომ მთავრობის წევრებმა ეს იცოდნენ, მე მაქვს მხედველობაში მმართველი კოალიცია, იმიტომ, რომ პრემიერმა განაცხადა, რომ მან იცოდა ამის შესახებ. ჩვენ ამის თაობაზე არაფერი ვიცოდით, ამიტომ "ნაციონალური მოძრაობისკენ" ხელის გამოშვერა აბსოლუტურად გაუგებარი და აბსურდია,"- განაცხადა მიხეილ მაჭავარიანმა.
ცნობისთვის, საქართველოს ცენტრალური საარჩევნო კომისიის ყოფილმა თავმჯდომარემ ზურაბ ხარატიშვილმა განაცხადა, რომ "თანამდებობიდან წასვლის შესახებ გადაწყვეტილება ჯერ კიდევ თვენახევრის წინ საქართველოს პრეზედენტ მიხეილ სააკაშვილს, პრემიერ-მინისტრ ბიძინა ივანიშვილს, პარლამენტის თავმჯდომარე დავით უსუფაშვილს და სხვა პოლიტიკურ ლიდერებს გააცნო".
"ამ თემაზე ერთი და ორი დღის განმავლობაში არ მიფიქრია. მეტსაც გეტყვით, დაახლოებით 1 თვე ან თვენახევრის წინა პერიოდში მე შევხვდი საქართველოს პრეზიდენტსაც, პრემიერ-მინისტრსაც, პარლამენტის თავმჯდომარესაც და სხვა პოლიტიკურ ლიდერებს და თანამდებობიდან წასვლის შესახებ ჩემი სურვილი გავაცანი. ალბათ იმის თქმა, რომ ეს მოულოდნელობა იყო, სწორი არ იქნება, იმიტომ, რომ მათთვის ეს საკითხი ცნობილი იყო. კიდევ ერთხელ მინდა ხაზი გავუსვა, რომ მთავარი დისკომფორტი, რაც ჩემი წასვლით იქმნება, ახალი თავმჯდომარის არჩევის პროცესი იქნება, რომლის კანდიდატურის შერჩევაზეც შეთანხმება წამყვან პოლიტიკურ ძალებს მოუწევთ. რაც შეეხება ადმინისტრაციას და ამომრჩეველს, არავითარი პრობლემა არ ექნებათ,"- განაცხადა ზურაბ ხარატიშვილმა და დასძინა, რომ საქართველოს პრეზიდენტსაც, პრემიერ-მინისტრსაც და პარლამენტის თავმჯდომარესაც მისი პოლიტიკაში შესაძლო წასვლის თაობაზეც ჰქონდათ ინფორმაცია
შეგახსენებთ, რომ საქართველოს ცენტრალური საარჩევნო კომისიის ყოფილმა თავმჯდომარემ ზურაბ ხარატიშვილმა პარლამენტს თანამდებობიდან მისი წასვლის შესახებ განცხადებით 12 აგვისტოს მიმართა. საარჩევნო ადმინისტრაციის ყოფილი ხელმძღვანელის თქმით, იგი ახალ პოლიტიკურ ცენტრს ქმნის, რომელშიც ღირებულებებზე აგებული პოლიტიკური სუბიექტები გაერთიანდებიან. მისივე თქმით, არ არის გამორიცხული ახალ პოლიტიკურ ცენტში "ეროვნულ დემოკრატიული პარტია" და პარტია "ევროპელი დემოკრატებიც" გაერთიანდნენ.
