საქართველოს ცენტრალური საარჩევნო კომისიის ყოფილი თავმჯდომარის ზურაბ ხარატიშვილის განცხადებით, მან დაახლოებით თვენახევრის წინ თანამდებობიდან წასვლის თაობაზე მისი სურვილი საქართველოს აღმასრულებელი და საკანონმდებლო ხელისუფლების უმაღლეს პოლიტიკურ პირებს გააცნო და შესაბამისად, მისი ეს გადაწყვეტილება მოულოდნელი არავისთვის უნდა ყოფილიყო.
როგორც ხარატიშვილმა დღეს გამართულ პრესკონფერენციაზე აღნიშნა, პრეზიდენტისგან, პრემიერისგან და პარლამენტის თავმჯდომარისგან თანამდებობაზე დარჩენის რჩევა მიიღო, თუმცა მისი ეს გადაწყვეტილება ხანგრძივი ფიქრის შედეგად, საბოლოოდ მიღებულ იქნა.
"ამ თემაზე ერთი და ორი დღის განმავლობაში არ მიფიქრია. მეტსაც გეტყვით, დაახლოებით 1 თვე ან თვენახევრის წინა პერიოდში მე შევხვდი საქართველოს პრეზიდენტსაც, პრემიერ-მინისტრსაც, პარლამენტის თავმჯდომარესაც და სხვა პოლიტიკურ ლიდერებს და თანამდებობიდან წასვლის შესახებ ჩემი სურვილი გავაცანი. ალბათ იმის თქმა, რომ ეს მოულოდნელობა იყო, სწორი არ იქნება, იმიტომ, რომ მათთვის ეს საკითხი ცნობილი იყო. კიდევ ერთხელ მინდა ხაზი გავუსვა, რომ მთავარი დისკომფორტი, რაც ჩემი წასვლით იქმნება, ახალი თავმჯდომარის არჩევის პროცესი იქნება, რომლის კანდიდატურის შერჩევაზეც შეთანხმება წამყვან პოლიტიკურ ძალებს მოუწევთ. რაც შეეხება ადმინისტრაციას და ამომრჩეველს, არავითარი პრობლემა არ ექნებათ,"- განაცხადა ზურაბ ხარატიშვილმა და დასძინა, რომ საქართველოს პრეზიდენტსაც, პრემიერ-მინისტრსაც და პარლამენტის თავმჯდომარესაც მისი პოლიტიკაში შესაძლო წასვლის თაობაზეც ჰქონდათ ინფორმაცია.
შეგახსენებთ, რომ საქართველოს ცენტრალური საარჩევნო კომისიის ყოფილმა თავმჯდომარემ ზურაბ ხარატიშვილმა პარლამენტს თანამდებობიდან მისი წასვლის შესახებ განცხადებით 12 აგვისტოს მიმართა. საარჩევნო ადმინისტრაციის ყოფილი ხელმძღვანელის თქმით, იგი ახალ პოლიტიკურ ცენტრს ქმნის, რომელშიც ღირებულებებზე აგებული პოლიტიკური სუბიექტები გაერთიანდებიან. მისივე თქმით, არ არის გამორიცხული ახალ პოლიტიკურ ცენტში "ეროვნულ დემოკრატიული პარტია" და პარტია "ევროპელი დემოკრატებიც" გაერთიანდნენ.
