ცენტრალური სარჩევნო კომისია მისი თავმჯდომარის ზურაბ ხარატიშვილის მიერ თანამდებობის დატოვებასთან დაკავშირებით გავრცელებულ ინფორმაციებს ეხმიანება და აცხადებს, რომ ხელმძღვანელის ცვლილება საარჩევნო პროცესზე გავლენას ვერ მოახდენს.
„მას შემდეგ, რაც თანამდებობა დატოვა ცესკო-ს თავმჯდომარე ზურაბ ხარატიშვილმა, მასობრივი ინფორმაციის საშუალებებით ურთიერთგამომრიცხავი ინფორმაციები გავრცელდა.
გვინდა სიცხადე შევიტანოთ შექმნილ ვითარებაში და განვაცხადოთ, რომ ცენტრალური საარჩევნო კომისიის ყველა წევრი აგრძელებს მუშაობას. ცესკო დამოუკიდებელი ინსტიტუტია, რომელიც კვალიფიციური კადრებით არის დაკომპლექტებული და მისი ხელმძღვანელის ცვლილება საარჩევნო პროცესზე გავლენას ვერ მოახდენს. ყველა საარჩევნო პროცედურა გამჭვირვალედ, სამართლიანად და კანონის შესაბამისად ჩატარდება.
მოსაზრებები, რომელთა თანახმად მოსალოდნელია ცვლილებები ცესკოს საქმიანობაში, საფუძველს მოკლებულია და ვთხოვთ მედიასაშუალებათა წარმომადგენლებს გაითვალისწინონ ეს ფაქტი.
ჩვენთვის დასანანია ბატონი ზურაბის გადაწყვეტილება, თუმცა მასთან ერთად განხორციელებულმა გარდაქმნებმა მნიშვნელოვნად გააუმჯობესა ადმინისტრაციის მართვის სისტემა და შესაბამისად, ამ მიმართულებით სირთულეები მოსალოდნელი არ არის", - ნათქვამია ცესკოს განცხადებაში.
