"ხარატიშვილი წავიდა, სხვებიც გაყვნენ, ვისაც სურვილი აქვს,"- აღნიშნული განცხადება საქართველოს პრემიერ-მინისტრმა ბიძინა ივანიშვილმა ცენტრალური საარჩევნო კომისიის თავმჯდომარე ზურაბ ხარატიშვილის მიერ თანამდებობიდან გადადგომის თაობაზე მიღებული გადაწყვეტილების კომენტირებისას გააკეთა.
ივანიშვილის შეფასებით, "ზურაბ ხარატიშვილიც "ნაციონალური მოძრაობის" წევრი იყო და ახლა რაღაც ინტრიგა ააგორეს, თუმცა ვერაფერს იზამენ".
მისივე თქმით, "ცენტრალური საარჩევნო კომისიის თავმჯდომარემ თანამდებობიდან წასვლითვის ცუდი დრო შეარჩია, რადგან მისმა გადაწყვეტილებამ პატარა პოლიტიკური ინტრიგა წარმოშვა".
"წავიდა და წავიდეს. ამათი გუნდის წევრია, რაღაც ინტრიგა ააგორეს კიდევ, მაგრამ ვერაფერს ვეღარ იზამენ, არაფერი აღარ მოხდება. ცუდ დროს წავიდა, არასწორ დროს წავიდა და ყველასთვის გასაგებია, რომ პოლტიკურად კიდევ პატარა ინტრიგა ჩააგდეს, მაგრამ მაგათ აღარავითარი თამაში აღარ აქვთ. სამი თვის წინ შევხვდი, მერე კიდევ შევხვდი, ყველაფერი გასაგებია, მაგრამ აღარაფერი მოხდება, საქართველოს ვეღარავინ ააყირავებს. ყველაფერი იქნება დაგეგმილი და გეგმაზომიერად განვითარდება", - განაცხადა ბიძინა ივანიშვილმა.
შეგახსენებთ, რომ საქართველოს ცენტრალური საარჩევნო კომისიის თავმჯდომარე ზურაბ ხარატიშვილმა ქვეყნის უმაღლეს საკანონმდებლო ორგანოს მისი თანამდებობიდან ათავისუფლების თაობაზე შესაბამისი განცხადებით მიმართა. ხარატიშვილი მისი გადაწყვეტილების მიზეზებზე 15 აგვისტოს ისაუბრებს.