"მინდა, გითხრათ, რომ ამ ვალდებულებას ბოლომდე გავატარებ, მე ვიბრძოლებ თითოეული ხმისთვის და გავიმარჯვებ ამ საპრეზიდენტო არჩევნებში. გპირდებით, რომ გავიმარჯვებ, იმიტომ რომ მე მაქვს იმედი ქართველი ერის პოლიტიკური სიბრძნის, არა მარტო იმედი, მე მაქვს ამის მაგალითი - შარშან, ერთი წლის წინ, ქართველი ერის საშუალებით და ქართველ ერთან ერთად, მშვიდობიანად შეცვალა ხელისუფლება და ჩვენ შევქმენით ახალი ტიპის გარდაქმნები და მთავრობა,"- ამის შესახებ კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა დღეს სენაკის რაიონის სოფელ ნოქალაქევში მისი წინასაარჩევნო კმპანიის ოფიციალურად გახსნის ცერემონიაზე სიტყვით გამოსვლისას ისაუბრა.
მარგველაშვილის თქმით, "საქართველოს ახალმა მთავრობამ შეცვალა დამოკიდებულება ხელისუფლებისა ხალხის მიმართ, ეს მთავრობა არის ხალხის, რომელიც ემსახურება საქართველოს თითოეულ მოქალაქეს და არა თავის ამბიციურ პროექტებს".
"ბუნებრივია, როდესაც ქვეყნის მთავარი პოლიტიკური ძალა გასახელებს თავის კანდიდატად, ეს უაღრესად დიდი ტვირთი და ვალდებულებაა. მე ვგრძნობ ამ ვალდებულებას და მადლობას ვუხდი ბიძინა ივანიშვილს და კოალიციას იმის გამო, რომ ასეთი დიდი ნდობა გამომიხატა. დემოკრატიული ღირებულებები, ევროპისკენ სწრაფვა, ევროატლანტიკურ სივრცეში ინტეგრაცია - ეს არის ქართველი ერის გადაწყვეტილება და ბუნებრივია, ჩვენ ამ კურსის ერთგული ვრჩებით, მაგრამ კიდევ უფრო მეტი - ჩვენმა ცხრათვიანმა მმართველობამ აჩვენა, რომ ის კლიშე თითქოს, ევროპისკენ მოძრაობა არ შეიძლება, თუ რუსეთთან უკიდურესი დაძაბულობა არ არის, ტყუილი იყო. ჩვენ შევცვალეთ ეს კლიშე. რეალურად არც ერთი მისხალი არ დაგვითმია ევროპული და ევროატლანტიკური ინტეგრციისა. ამავე დროს, ჩვენ შევძელით და დავიწყეთ რუსეთთან ურთიერთობის ნორმალიზიაცია. შესაბამისად, იგივე კურსი გაგრძელდება მომავალშიც. საქართველოს სჭირდება სტაბილური და მდგრადი საგარეო პოლიტიკა", - განაცხადა გიორგი მარგველაშვილმა.
შეგახსენებთ, რომ კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა მისი წინასაარჩევნო კამპანია დღეს ოფიციალურად სენაკიდან დაიწყო. ამომრჩეველთან მარგველაშვილის პირველ შეხვედრას საქართველოს პრემიერ-მინისტრი ბიძინა ივანიშვილი, შინაგან საქმეთა მინისტრი ირაკლი ღარიბაშბვილი, აღმასრულებელი ხელისუფლების სხვა წარმომადგენლები და ქვეყნის უმაღლესი საკანონმდებლო ორგანოს უმრავლესობის წევრებიც დაესწრნენ. აღნიშნულ ღონისძიებაზე საქართველოას პრემიერ მინისტრმა გიორგი მარგველაშვილს მის მიერ 2012 წლის საპარლამენტო არჩევნების წინა პერიოდში ნაქონი კალამი გადასცა, რას ივანიშვილის თქმით, "მარგველაშვილის გამარჯვების და წარმატების სიმბოლო იქნება".