როგორც ივანიშვილმა დღეს სენაკის რაიონის სოფელ ნოქალაქევში გიორგი მარგველაშვილის წინასაარჩევნო კამპანიის პრეზენტაციაზე სიტყვით გამოსვლისას აღნიშნა, მსგავსი სიმბოლური საჩუქარი მარგველაშვილს წარმატებას აუცილებლად მოუტანს.

პრემიერის თქმით, გიორგი მარგველაშვილი ევროპული ყაიდის ლიდერია და კოალიცია "ქართულმა ოცნებამ" მისი საპრეზიდენტო კანდიდატად წარმოდგენით, სტერეოტიპი დაარღვია.

"ისევ საარჩევნო კამპანიის რეჟიმში ვხვდებით მოსახლეობას. ისევ გამარჯვებისთვის ვემზადებით. ჩვენი შეხვდერისთვის შევარჩიეთ ეს ისტორიული ადგილი, საიდანაც საქართველოს გამთლიანება დაიწყო. ქუჯის ციხე, ციხე გოჯი ჩვენი ქვეყნის ერთიანობის სიმბოლოდ მიიჩნევა და სწორედ აქედან გვინდა დავიწყოთ ჩვენი ოფიციალური წინასაარჩევნო კამპანია. ქართულ საზოგადოებას, ჩვენს ამომრჩეველს კიდევ ერთხელ მინდა წარვუდგინო პოლიტიკური კოალიცია "ქართული ოცნების" საპრეზიდენტო კანდიდატი გიორგი მარველაშვილი. პრეზიდენტობის კანდიდატად წარმოგიდგენთ ჩვენი საზოგადოების ღირსეულ წარმომადგენელს, ევროპული ყაიდის ლიდერს და ამით ვარღვევთ წლების განმავლობაში ჩვენს ქვეყანაში დამკვიდრებულ სტერეოტიპს, რომ ლიდერი, ქვეყნის პრეზიდენტი ზეკაცი და ყველას პატრონი უნდა იყოს, რომელიც ყველაფერს ჩვენს მაგივრად გადაწყვეტს. ევროპაში ეს ასე არ არის და ჩვენთანაც უნდა დავამსხვრიოთ ეს მახინჯი სტერეოტიპი, უნდა დავამკვიდროთ დემოკრატიული მმართველობის სტილი და ქვეყნის პრეზიდენტად ევროპულად მოაზროვნე ადამიანი ავირჩიოთ, რაც დაამთავრებს საქართველოში ერთი კაცის ჭკუაზე ქვეყნის მართვას, ერთი კაცის იმედად ქვეყნის ყოფნას და ყველას დაანახებს, რომ ჩვენც შეგვიძლია დემოკრატიული ღირებულებებით აზროვნება, ცხოვრება და სახელმწიფოს შენება. ამომრჩეველს ვთავაზობთ პრეზიდენტობის კანდიდატს, რომელიც ჩვენი საზოგადოების წევრია, ის ერთ-ერთი ჩვენგანია, რომელსაც მომდევნო 5 წლით ავირჩევთ და ხალხის სამსახურში ჩავაყენებთ. ამომრჩეველს ვთავაზობთ კანდიდატს, რომელიც არასოდეს გამოჰკიდებია თანამდებობას. გიორგი მარგველაშვილს მაღალი თანამდებობის გარეშეც მაღალი ადგილი უჭირავს ჩვენს საზოგადოებაში. გიორგი მარგველაშვილი არის ჩვენი თანაგუნდელი, გამორჩეული ადამიანი, რომელსაც არასოდეს უღალატია პიროვნული თავისუფლებისათვის. ეს არის დამოუკიდებელი და გაბედული კაცი, რომელიც არ ერიდება თამამ გადაწყვეტილებას და ეს მან მინისტრის პოსტზე ყოფნის დროს დაამტკიცა. გიორგი საოცრად უშუალო ადამიანია, ინტელექტუალური, ფილოსოფიური მეცნიერების დოქტორი, იგი წარმატებით უძღვებოდა ერთ-ერთ საუკეთესო უმაღლეს სასწავლებელს. სხვათა შორის, ამ სასწავლებლის დაფუძნებაშიც მას ლომის წვლილი მიუძღვოდა. მიუხედავად იმისა, რომ გიორგი ყოველთვის ახლოს იყო პოლიტიკასთან, მას ვერასოდეს ვერავინ დასწამებს, რომ პოლიტიკური ინტრიგების მონაწილე იყო. იგი არც ერთი პარტიის წევრი არ არის. დარწმუნებული ვარ, ჩვენი მომავალი პრეზიდენტი ყველას ინტერესების დამცველი იქნება. გიორგი მარგველაშვილი მთელი ქვეყნის პრეზიდენტი იქნება, ყველას პრეზიდენტი იქნება ჩვენი გიორგი. იმედი მაქვს, საპრეზიდენტ არჩევნებით ჩვენ კიდევ ერთ ტესტს ჩავაბარებთ. ჩვენ დავარწმუნებთ ყველას, რომ ის ხელისუფლება ვართ, რომელსაც თავისუფალი და სამართლიანი არჩევნების ჩატარება შეუძლია. ჩვენ ვართ ის პოლიტიკური ძალა, რომელსაც ჰყავს ის საპრეზიდენტო კანდიდატი, როგორიც ეკადრება საქართველოს - ევროპისკენ მიმავალ ქვეყანას. საპრეზიდენტო არჩევნები უნდა გახდეს საქართველოში მომხდარი ფუნდამენტური ცვლილებების ყველაზე უფრო მკაფიო დემონსტრირება.ჩვენ სპოლიტიკურ გუნდს ამ არჩევნებში დამაჯერებელი გამარჯვების ამბიცია აქვს. დარწმუნებული ვარ, საპრეზიდენტო არჩევნებში პატიოსან ბრძოლაში ღირსეული კანდიდატი ღირსეულად გაიმარჯვებს და ეს იქნება გიორგი მარგველაშვილი. ღრმად მწამს, რომ გიორგი მარგველაშვილის გამარჯვება ჩვენი ქვეყნის საერთო გამარჯვება იქნება. ეს კი იმის გარანტია იქნება, რომ საქართველო დემოკრატიული პოლიტიკური განვითარების ევროპულ გზას დაადგება. დაადგება წინსვლისა და განვითარების გზას, რომლიდან გადახვევაც ადვილი არ იქნება. გამარჯვებას ვუსურვებ ბატონ გიორგის ამ მნიშვნელოვან ბრძოლაში და დარწმუნებული ვარ, იგი ყველა ჩვენგანის, ყველა ამომრჩევლის იმედებს გაამართლებს და ჩვენი ქვენისათვის ამ მეტად მნიშვნელოვან ეტაპზე წარმატებული პრეზიდენტი იქნება. გიორგი მარგველაშვილი ყველას პრეზიდენტი იქნება,"- განაცხადა ბიძინა ივანიშვილმა.