საპარლამენტო უმცირესობის წევრის გიორგი ვაშაძის ინფორმაციით, ხონში "ერთიანი ნაციონალური მოძრაობის" საპრეზიდენტო კანდიდატ დავით ბაქრაძის დაგეგმილი წინასაარჩევნო შეხვედრის ჩაშლა იგეგმება.
ამის შესახებ ვაშაძემ დღეს "ნაციონალური მოძრაობის" ცენტრალურ ოფისში გამართულ საგანგებო პრესკონფერენციაზე ისაუბრა და აღნიშნა, რომ "პრემიერ-მინისტრის დაპირება, რომ ყველა საპრეზიდენტო კანდიდატს წინასაარჩევნო კამპანიის თანაბარი პირობები ექნება, არ სრულდება".
"ხონში, სადაც დავით ბაქრაძე მოსახლეობას ხვდება, "ქართული ოცნების" ოფისთან მოქალაქეების მობილიზება მიმდინარეობს, რომლებიც ამ შეხვედრის ჩაშლას აპირებენ. ეს ძალიან სამწუხარო ფაქტია, მით უმეტეს, თუ პრემიერის განცხადებას გავითვალისწინებთ იმის თაობაზე, რომ თითქოს ყველაზე საუკეთესო საარჩევნო გარემო ამ არჩევნების დროს იქნება. კიდევ ერთხელ მოვუწოდებ "ქართულ ოცნებას", რომ ჯობია დროულად შევიდეთ ნორმალურ საარჩევნო კალაპოტში და მოსახლეობასთან შეხვედრისას ჩვენთვის ხელის შეშლას ნუ შეეცდებიან,"- განაცხადა გიორგი ვაშაძემ.