"სირთულეებს გადავლახავთ რომ ქვეყანა იყოს მთლიანი და არც ერთ მომენტში პროვოკაციაზე არ წამოვეგებით,"- ამის შესახებ კოალიცია "ქართული ოცნების" პრეზიდენტობის კანდიდატმა გიორგი მარგველაშვილმა ქვეშში გუშინ მომხდარი ინციდენტის კომენტირებისას ისაუბრა.
"ჩვენ არაერთი მიმდინარე გამაღიზიანებელი პრობლემა გვაქვს ხოლმე. აქედან 6 კილომეტრში არის საზღვარი, ეს არ არის საზღვარი, ესაა სადემარკაციო ხაზი. ჩვენ ეს პრობლემები გვაქვს, მაგრამ ქართველ ხალხთან ერთად ჩვენ ამ პროვოკაციებს, ამ სირთულეებს გადავლახავთ უფრო მაღალი მიზნისთვის - რომ ქვეყანა იყოს მთლიანი, ერთიანი, ძლიერი და არც ერთ მომენტში არ წამოვეგებით პროვოკაციაზე", - განაცხადა გიორგი მარგველაშვილმა.
შეგახსენებთ, რომ გუშინ უცნობმა შეიარაღებულმა პირებმა ოკუპირებული ცხინვალის რეგიონის მხრიდან საქართველოს შინაგან საქმეთა სამინისტროს საპატრულო პოლიციის დეპარტამენტის ეკიპაჟის მიმართულებით ცეცხლსასროლი იარაღიდან ერთი გასროლა განახორციელეს.
ქვეშში მომხდარ ინციდენტთან დაკავშირებით, საქართველოს შინაგან საქმეთა სამინისტრომ და ოკუპირებული ცხინვალის რეგიონის ე.წ. ძალოვანმა უწყებამ ინფორმაცია გუშინ გაავრცელეს.
ოსური მხარის ინფორმაციით, ინციდენტის შემდეგ ე.წ.სამხრეთ ოსეთის დე-ფაქტო ხელისუფლების საზღვრის დეპარტამენტის წარმომადგენლის მიერ ჩატარებულ საქმის განხილვას საქართველოს შინაგან საქმეთა სამინისტროს თანამშრომლები და ევროკავშირის სამშვიდობო მისიის წარმომადგენლები ესწრებოდნენ.
„ქართულმა მხარემ აღიარა საზღვრის დარღვევის ფაქტი, და ასევე ის რომ ჰაერში გასროლა მოხდა გაფრთხილების მიზნით",-აღნიშნულია ოსური მხარის განცხადებაში.
ქვეშში მომხდარ ფაქტთან დაკავშირებით ოფიციალური განცხადება ევროკავშირის სადამკვირვებლო მისიამაც გაავრცელა.
„10 აგვისტოს, დაახლოებით დილის 11:00 საათზე, ევროკავშირის სადამკვირვებლო მისია თავის ყოველდღიურ მონიტორინგს ახორციელებდა ქვეშის მიმდებარე ტერიტორიაზე. ადმინისტრაციული სასაზღვრო ზოლის მეორე მხრიდან გასროლა მას შემდეგ მოხდა, რაც ქართული პოლიციის მანქანა გამოჩნდა და მოტრიალდა ბარიერის წინ, რომელსაც ე.წ. სამხრეთ ოსეთის შეიარაღებული პერსონალი აკონტროლებს. სროლის შედეგად არავინ დაშავებულა.ევროკავშირის სადამკვირვებლო მისია და ქართული პოლიცია გაეცალა ინციდენტის ადგილს. 2008 წლის ომის წლისთავზე, ევროკავშირის მონიტორინგის მისია მოუწოდებს ყველა მხარეს გამოიჩინონ უკიდურესი თავშეკავება და თავი შეიკავონ პროვოკაციისგან",- ნათქვამია ევროკავშირის სადამკვირვებლო მისიის განცხადებაში.