"არ გამაკეთებინონ ის, რომ ერთი ბრძანება გავცეთ და ვთქვათ, რომ სააკაშვილი არ შევიდეს რომელიმე რაიონში და თუ შევა, ვნახოთ,"- ამის შესახებ საპარლამენტო უმრავლესობის ლიდერმა დავით საგანელიძემ გუშინ საღამოს ზუგდიდში, რესტორან "დიარონთან" საქართველოს პრეზიდენტ მიხეილ სააკაშვილის სტუმრობის პარალელურად "ქართული ოცნების" მხარდამჭერების მიერ გამართული საპროტესტო აქციის კომენტირებისას ისაუბრა.
საგანელიძის თქმით, "მომხდარ ფაქტს ხელისუფლებასთან არავითარი კავშირი არ აქვს და "ქართულ ოცნებას" მიხეილ სააკაშვილის გადაადგილებისთვის ხელის შეშლა რომ უნდოდეს, ამას მარტივად მოახერხებდა".
"ჩვენ, იმ პოლიტიკურ ძალას, რომელსაც "ქართული ოცნება" ჰქვია, რომ გვინდოდეს, რომ მიხეილ სააკაშვილის მოძრაობა შევაფერხოთ, ან მათი ღონისძიებები ჩავშალოთ, ან არ მივცეთ შენობაში შესვლის საშუალება, 5 წუთში დავანახებდი, როგორ მოხდებოდა ეს. თუ ეს ძალიან აინტერესებს, მართლა არ გამაკეთებინონ ის, რომ ერთი ბრძანება გავცეთ ჩვენ და ვთქვათ, რომ აბა, მიხეილ სააკაშვილი არ შევიდეს რომელიმე რაიონში და თუ შევა, ვნახოთ. მერე მიხვდება, როგორი აბსოლუტურად თავისუფალი ველი აქვს სამოძრაოდ დღეს. ერთადერთი შემთხვევა იყო, "ნაციონალური მოძრაობის" საწინააღმდეგო აქციაზე ვიღაცამ ქვა ისროლა, რისთვისაც ეს ადამიანი დაისაჯა და პარტიიდან გაირიცხა", - განაცხადა დავით საგანელიძემ.
შეგახსენებთ, რომ გუშინ საღამოს, ზუგდიდში, რესტორან "დიარონში" პრეზიდენტის სტუმრობის პარალელურად საპროტესტო აქცია გაიმართა.
ადგილზე შეკრებილმა მომიტინგეებმა მიხეილ სააკაშვილის რესტორანში ვიზიტი ხმამაღალი მოწოდებებით და სტვენით გააპროტესტეს. აქციაზე ისმოდა შეძახილები - "მიშა შე მკვლელო", "ნაძირალა", "სამეგრელოში მიხეილ სააკაშვილის თარეში უნდა დასრულდეს" და სხვა.
ქვეყნის პირველი პირი "დიარონში" საპარლამენტო უმცირესობის წევრ გოგა ხაჩიძესთან და "ნაციონალური მოძრაობის" სხვა წარმომადგენლებთან ერთად იმყოფებოდა.
როგორც ხაჩიძემ რესტორნის მიმდებარე ტერიტორიაზე გამართული აქციის კომენტირებისას აღნიშნა, მისთვის უცნობია, პრეზიდენტის ვიზიტის შესახებ მომიტინგეებმა როგორ მიიღეს ინფორმაცია, რადგან მიხეილ სააკაშვილმა სავახშმოდ წასვლა "დიარონში" მისვლამდე 15 წუთით ადრე გადაწყვიტა.
"მე ვარ პირადად მომსწრე, პრეზიდენტის გვერდით ვიყავი, როდესაც დაახლოებით 15 წუთით ადრე გაიგო ამ რესტორანმა ჩვენი მოსვლის შესახებ და რეალურად, მთელი დღის დამშეული ხალხი ვიყავით, თორემ ასეთ დროს ნამდვილად არავინ აპირებს რესტორნებში სავახშმოდ სიარულს. ძალიან საინტერესოა ამ დროს რესტორნანთან შეკრებილმა ხალხმა საიდან გაიგო ამ სტუმრობის შესახებ, რომ ასე მოსულიყვნენ და მსგავსი ტიპის აქცია გაემართათ,"- განაცხადა გოგა ხაჩიძემ.
რესტორან "დიარონთან" გამართული აქციის ერთ-ერთი ორგანიზატორის, არასამთავრობო ორგანიზაცია "დაიცავი საქართველოს" ლიდერ კახა მიქაიას განცხადებით, "სამეგრელოში და ზუგდიდში მიხეილ სააკაშვილის ნებისმიერ გადაადგილებას ყოველთვის სათანადო პროტესტი მოჰყვება".
"რეგულარულად ვაპროტესტებ ზუგდიდში მიხეილ სააკაშვილის ჩამოსვლას. ჩვენ ამ პროტესტს გავაგრძელებთ, რადგან მე ერთხელ ვთქვი და ახლაც გავიმეორებ, რომ მას შემდეგ, რაც მიხეილ სააკაშვილის რეჟიმმა მთელს ქვეყანაში და განსაკუთრებით სამეგრელოში დაატრიალა, სააკაშვილს არ აქვს მორალური უფლება სამეგრელოში, კერძოდ ზუგდიდში იაროს, იჯდეს და ქეიფობდეს რესტორნებში, რეზიდენციაში ვიაცეები დაჰყავდეს. ეს არის ამორალური საქციელი,"- განაცხადა კახა მიქაიამ.
მიხეილ სააკაშვილმა რესტორანი "დიარონი" გაძლიერებული დაცვის თანხლებით დატოვა.
ადგილზე მთელი ღამის განმავლობაში შინაგან საქმეთა სამინისტრის საპატრულო პოლიციის დეპარტამენტის ბრიგადები მუშაობდნენ.
