"გიორგი მარგველაშვილს ადმინისტრაციული რესურსის გამოყენება რომ ნდომებოდა, უფლება ჰქონდა ბოლო დღემდე განათლების მინისტრი ყოფილიყო,"- ამის შესახებ საპარლამენტო უმრავლესობის ლიდერმა დავით საგანელიძემ არასამთავრობო ორგანიზაცია "სამარლიანი არჩევნების" მიერ კოალიცია "ქართული ოცნების" პრეზიდენტობის კანდიდატ გიორგი მარგველაშვილის წინასაარჩევნო საქმიანობასთან დაკავშირებით დაფიქსირებული შენიშვნების კომენტირებისას ისაუბრა.
საგანელიძის თქმით, "მმართველი გუნდის პრეზიდენტობის კანდიდატი გიორგი მარგველაშვილი ახმეტაში გამართულ ღონისძიებაზე ჩავიდა როგორც მოქალაქე მარგველაშვილი, რადგან ის ოფიციალურად დღესაც არ არის საპრეზიდენტო კანდიდატი".
"მიკვირს, რომ ძალიან ბევრი არასამთავრობო ორგანიზაცია დღეს იმ თემებზე საუბრობს, რომლებიც წლების განვლობაში ერთი ასად და ერთი ათასად იყო აქტუალური და გაჩუმებული იყვნენ. ახლა ეძებენ მიზეზს, რომ რაიმე სალაპარაკო გახდეს. გიორგი მარგველაშვილს ადმინისტრაციული რესურსის გამოყენება რომ სდომოდა, უფლება ჰქონდა ბოლო დღემდე განათლების მინისტრი ყოფილიყო. მან ძალიან მაღალი ზნეობრივი ნაბიჯი გადადგა და მინისტრის პოსტი დატოვა. მარგველაშვილი ერთადერთი პირია ბოლო წლების მანძილზე, რომელმაც ყველა ბერკეტი დათმო, რაც შეიძლება ჰქონოდა,"- განაცხადა დავით საგანელიძემ.
ცნობისთვის, არასამთავრობო ორგანიზაცია "სამართლიანი არჩევნების" მიერ 2013 წლის საპრეზიდენტო არჩევნებთან დაკავშირებით გავრცელებულ დასკვნაში ნათქვამია, რომ კოალიცია "ქართული ოცნების" პრეზიდენტობის კანდიდატი გიორგი მარგველაშვილი წინასაარჩევნო კამპანიისას ადმინისტრაციულ რესურსს იყენებს.
"30 ივლისს მარგველაშვილი "შრომის კოდექსის" პრეზენტაციასთან დაკავშირებით გამართულ ღონისძიებას დაესწრო, რომელიც იუსტიციის სამინისტროს მიერ იყო ორგანიზებული. აგრეთვე, ახმეტის მაჟორიტარ დეპუტატთან და კულტურის სამინისტროს წარმომადგენლებთან ერთად ესწრებოდა თუშეთში გამართულ სახალხო დღესასწაულს - თუშეთობას. ღონისძიებაზე ახმეტის მაჟორიტარმა დეპუტატმა ზურაბ ზვიადაურმა მარგველაშვილი პრეზიდენტობის კანდიდატის სტატუსით წარადგინა", - ნათქვამია "სამართლიანი არჩევნების" მიერ გავრცელებულ შუალედურ დასკვნაში.