"ოპოზიციაში ყოფნას აქვს ერთი ძალიან დიდი პოზიტივი, გაძლევს საშუალებას, დაჯდე და იფიქრო წარსულზე, გაანალიზო, რა გააკეთე და რა ვერ გააკეთე, იფიქრო იმაზე, როგორი უნდა იყო, რომ დაიბრუნო მოსახლეობის ნდობა,"- ამის შესახებ "ნაციონალური მოძრაობის" საპრზიდენტო კანდიდატმა დავით ბაქრაძემ მარნეულში მოსახლეობასთან შეხვედრისას ისაუბრა.
ბაქრაძის თქმით, "ყოფილი ხელისუფლების მიერ განვლილ 9 წელიწადში, ბევრ გაკეთებულ საქმესთან ერთად ბევრი გადაუწყვეტელი პრობლემაც დაგროვდა და იყო შეცდომებიც, ამიტომ ბუნებრივია, რომ ადამიანებმა სიახლის მოლოდინში და სიახლის სასარგებლოდ გააკეთეს არჩევანი".
"სხვა საკითხია, რამდენად მიიღეს მათ ეს სიახლე, მაგრამ ბუნებრივი პროცესია, რომ 9 წელი ხელისუფლებაში ყოფნის შემდეგ პარტიამ წააგოს არჩევნები და გადავიდეს ოპოზიციაში. ოპოზიციაში ყოფნას აქვს ერთი ძალიან დიდი პოზიტივი, გაძლევს საშუალებას, დაჯდე და იფიქრო წარსულზე, რომ დაიბრუნო მოსახლეობის ნდობა. აი, ეს არის ჩემთვის პირადად მთავარი ამოცანა, რომ ოპოზიციაში ყოფნის პერიოდში მუდმივად გავაანალიზო, რა გავაკეთეთ და რა ვერ გავაკეთეთ, რა მოეწონა და ვერ მოეწონა ჩვენს მოსახლეობას, სად მოვიქეცით სწორად, სად დავუშვით შეცდომა და ამ ყველაფრის საფუძველზე მართლაც განახლებული სახით წარვსდგეთ ხალხის წინაშე, ეს განახლებული სახე იყოს არა უბრალოდ სიტყვები, არამედ პროგრამა, მოქმედებები და კონკრეტული ნაბიჯები, რომელსაც ხალხი და საზოგადოება დაინახავს მომდევნო თვეების განმავლობაში," - განაცხადა დავით ბაქრაძემ.
