"რუსეთთან დიპლომატიური ურთიერთობების აღდგენის საკითხი დღის წესრიგში მას შემდეგ შეიძლება დადგეს, რაც სერიოზულ წინსვლას მივაღწევთ ქვეყნის ტერიტორიული გამთლიანების გზაზე,"- ამის შესახებ საქართველოს პრემიერ-მინისტრმა ბიძინა ივანიშვილმა დღეს გორის ცენტრალურ მოედანზე სამხედრო მოსამსახურეების ფიცის დადების ცერემონიის დასრულების შემდეგ ჯარისკაცებისთვის სიტყვით მიმართვისას ისაუბრა.
პრემიერის თქმით, "საქართველოს ხელისუფლება მიაღწევს ქვეყნის დეოკუპაციას და მოძმე ხალხთან - აფხაზებთან და ოსებთან უთიერთობებსაც აღადგენს, ისეთ ქვეყანას შექმნის, რომელიც ყველასთვის საამაყო იქნება".
"კარგად გვესმის, რომ ტერიტორიული მთლიანობის აღდგენის პრობლემას ერთი ხელის მოსმით ვერ გადავწყვეტთ. დარწმუნებული ვარ, ამ საქმეში ქმედით მხარდაჭერას გაგვიწევენ ჩვენი სტრატეგიული პარტნიორები - ამერიკის შეერთებული შტატები, ევროკავშირის ქვეყნები და საერთაშორისო ორგანიზაცეიბი. სწორედ ამიტომ, ჩვენი ყოველი ნაბიჯი ისე უნდა იყოს გათვლილი, რომ ჩვენს სტრატეგიულ პარტნიორებს ჩვენი დახმარება გაუადვილდეთ. ჩვენ არაერთხელ ვთქვით და ახლაც ხმამაღლა ვაცხადებ - საქართველოს დასავლური ორიენტაცია, ინტეგრაცია ევროკავშირსა და ნატო-ში, არის ჩვენი ერის სტრატეგიული არჩევანი, რომელსაც ალტერნატივა არ აქვს. დარწმუნებული ვარ, ამ მიზნამდე აუცილებლად მივალთ. ჩვენი ქვეყანა სირთულეებს გაუმკლავდება," - განაცხადა ბიძინა ივანიშვილმა.
ცნობისთვის, დღეს გორის ცენტრალურ მოედანზე თავდაცვის სამინისტროს სამხედრო მოსამსახურეების ფიცის დადების ცერემონია გაიმართა, რომელსაც ქვეყნის თავდაცვის მინისტრი ირაკლი ალასანია, პრემიერ-მინისტრი ბიძინა ივანიშვილი, გაერთიანებული შტაბის უფროსი ირაკლი ძნელაძე და ხელისუფლების სხვა წარმომადგენლები დაესწრნენ.