"2008 წელს საქართველოს ოკუპირებული ტერიტორიები რუსეთმა დამოუკიდებელ სახელმწიფოებად გამოაცხადა და ეს იყო უდიდესი დარტყმა საქართველოს სახელმწიფოებრიობაზე,"- ამის შესახებ საქართველოს პრემიერ-მინისტრმა ბიძინა ივანიშვილმა დღეს გორის ცენტრალურ მოედანზე სამხედრო მოსამსახურეების ფიცის დადების ცერემონიის დასრულების შემდეგ ჯარისკაცებისთვის სიტყვით მიმართვისას ისაუბრა.
მისივე თქმით, "რუსეთის ფედერაციას და საქართველოს ურთიერთობის შემდეგ ეტაპზე კიდევ უფრო რთული პრობლემების მოგვარება მოუწევთ".
ამასთან, პრემიერ-მინისტრი მიიჩნევს, რომ "მიუხედავად ოკუპირებული ტერიტორიების საზღვრისპირა სოფლებთან რუსუ სამხედროების მიერ მავთულხლართების გავლებისა, საქართველოს ხელისუფლება სიმშვიდეს ინარჩუნებს და პრაგმატულ პოლიტიკას აგრძელებს".
"საქართველოს საერთაშორისო პარტნიორებმა დადებითად შეაფასეს რუსეთთან დიალოგის ახალი ფორმატი, როგორც დაძაბულობის შემცირებისკენ მიმართული კონსტრუქციული ნაბიჯი. ამ ფონზე, როგორც ჩვენთვის, ისე საერთაშორისო საზოგადოებისთვის გაუგებარი და აუხსნელია ჩვენი ქვეყნის სიღრმეში მავთულხლართების გადმოწევა. და მაინც, მიუხედავად ამისა, ჩვენ ვინარჩუნებთ სიმშვიდეს და კვლავ თანმიმდევრულად მივდევთ ჩვენს მიერ დასახულ პრაგმატულ პოლიტიკას. 2008 წლის აგვისტოში რუსეთმა საქართველოს წინააღმდეგ შეიარაღებული აგრესია განახორციელა. ქვეყნის ოკუპირებული ტერიტორიები რუსეთმა დამოუკიდებელ სახელმწიფოებად გამოაცხადა. ეს იყო უდიდესი დარტყმა საქართველოს სახელმწიფოებრიობაზე. მოვლენების ამგვარად განვითარებაში სამწუხაროდ, ქართულ მხარეს პასუხისმგებლობის თავისი წილი აქვს, რაც 2009 წელს ევროკავშირმა თავის დასკვნითაც დაადასტურა. ამ ტრაგიკული გამოცდილებიდან არა მარტო მკაფიო დასკვნები უნდა გამოვიტანოთ, არამედ მომავალზეც უნდა ვიზრუნოთ. მიუხედავად ყველაფრისა, ჩვენ გვიწევს რუსეთთან ურთიერთობის ფორმების ძიება. გასული წლის ბოლოს პირდაპირი დიალოგი დავიწყეთ და საწყის ეტაპზე კონკრეტული, პრაგმატული საკითხების გადაწყვეტა დავისახეთ მიზნად. შემდეგ ეტაპზე ჩვენ მოგვიწევს კიდევ უფრო რთული პრობლემების მოგვარება. ჩვენს ხალხებს შორის კეთილი დამოკიდებულება გვაძლევს იმედს, რომ ეს პროცესი პოზიტიურად განვითარდება", - განაცხადა ივანიშვილმა.
ცნობისთვის, დღეს გორის ცენტრალურ მოედანზე თავდაცვის სამინისტროს სამხედრო მოსამსახურეების ფიცის დადების ცერემონია გაიმართა, რომელსაც ქვეყნის თავდაცვის მინისტრი ირაკლი ალასანია, პრემიერ-მინისტრი ბიძინა ივანიშვილი, გაერთიანებული შტაბის უფროსი ირაკლი ძნელაძე და ხელისუფლების სხვა წარმომადგენლები დაესწრნენ.