"მე მჯერა, რომ საქართველოს ისტორიის ამ ტრაგიკული დღებიდან სწორ დასკვნებს გამოვიტანთ და სწორად გათვლილ სამომავლო გეგმებს დავსახავთ,"- ამის შესახებ საქართველოს პრემიერ-მინისტრმა ბიძინა ივანიშვილმა დღეს გორის ცენტრალურ მოედანზე სამხედრო მოსამსახურეების ფიცის დადების ცერემონიის დასრულების შემდეგ ჯარისკაცებისთვის სიტყვით მიმართვისას ისაუბრა.
ივანიშვილის თქმით, "საქართველომ უნდა შეძლოს და აღიაროს საკუთარი შეცდომებიც, უნდა გამოსწორდეს რისი გამოსწორებას ჯერ კიდევ შესაძლებელია და არსებული მდგომარეობა დიდი ხანი არ გაგრძელდება".
"5 წელი გავიდა აგვისტოს ომის შემდეგ. ის უმძიმესი დღეები მაშინ ყველამ ერთად გადავიტანეთ და განვიცადეთ. ნგრევა და მსხვერპლი, ასეულობით დაღუპული ადამიანი, ახალი ოკუპირებული ტერიტორიები, საკუთარ სამშობლოში დევნილად ქცეული ათიათასობით ჩვენი თანამემამულე. ეს არის ის უმძიმესი შედეგი, რომელიც 8 აგვისტოს ომმა მოგვიტანა. პატივი და დიდება ყველა იმ ჯარისკაცსა და ოფიცერს, ვინც გმირულად იბრძოდა და საკუთარი სიცოცხლის ფასად იცავდა სამშობლოს. სამარადისო ხსოვნა ომში დაღუპულ ადამიანებს, იქნება ეს ქართველი თუ ოსი ჩვენი თანამოქალაქე. მე მჯერა, რომ საქართველოს ისტორიის ამ ტრაგიკული დღებიდან სწორ დასკვნებს გამოვიტანთ და სწორად გათვლილ სამომავლო გეგმებს დავსახავთ. მწამს, რომ თანმიმდევრული სტრატეგიით შევძლებთ ქართველებსა და ოსებს, ქართველსა და აფხაზებს შორის მშვიდობიანი ურთიერთობის სრულფასოვნად აღდგენას. ჩვენ მოვიკრებთ ძალას და შევძლებთ პატიებას, მაგრამ ეს არ არის საკმარისი. ჩვენ უნდა შევძლოთ და ვაღიაროთ საკუთარი შეცდომებიც. უნდა გამოვასწოროთ რისი გამოსწორებას ჯერ კიდევ შესაძლებელია. ეს მდგომარეობა დიდი ხანი არ გაგრძელდება", - განაცხადა ბიძინა ივანიშვილმა.
ცნობისთვის, დღეს გორის ცენტრალურ მოედანზე თავდაცვის სამინისტროს სამხედრო მოსამსახურეების ფიცის დადების ცერემონია გაიმართა, რომელსაც ქვეყნის თავდაცვის მინისტრი ირაკლი ალასანია, პრემიერ-მინისტრი ბიძინა ივანიშვილი, გაერთიანებული შტაბის უფროსი ირაკლი ძნელაძე და ხელისუფლების სხვა წარმომადგენლები დაესწრნენ.
