"ნებისმიერი ტიპის უთანხმოება და კონფლიქტი მშვიდობიანი გზით უნდა მოვაგვაროთ"- აღნიშნული კომენტარი საქართველოს იუსტიციის მინისტრმა თეა წულუკიანმა მუხათგვერდის სამხედრო მოსამსახურეთა სასაფლაოზე 2008 წლის რუსეთ-საქართველოს ომში დაღუპული ჯარისკაცების ხსოვნისათვის პატივის მიგების შემდეგ გააკეთა.
მინისტრის თქმით, "2008 წლის რუსეთ-საქართველოს ომში არც ერთი მხარე გამარჯვებული არ არის".
"ჩვენ არც ერთი ამ ომში გამარჯვებული არ ვართ. ჩვენი ხელისუფლება აბსოლუტურად სხვა პირობებში ხვდება ამ წლის 8 აგვისტოს, რადგან ჩვენ გადაწყვეტილი გვაქვს და ამ გზას არ გადავუხვევთ, რომ ნებისმიერი ტიპის უთანხმოება და ნებისმიერი ტიპის კონფლიქტი მოვაგვაროთ მშვიდობიანი გზით. ამაში ჩვენ გვაქვს ერთმანეთის მხარეების იმედი, პირველ რიგში ჩვენი ოსი ძმების. შეცდომები არც ერთმა აღარ უნდა გავიმეოროთ და მომავალში ყურება ვისწავლოთ. მე მჯერა, რომ ქართული მხარის პოზიცია, რომელიც 6 პუნქტიან გეგმას მკაცრად იცავს, რუსეთიც ისწავლის ამ პუნქტების დაცვას,"- განაცხადა თეა წულუკიანმა.
შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.
