როგორც სტალინი ეუბნებოდა ფინეთს, მოგვეცი კარელია გვჭირდებაო, ისე გვეუბნებოდნენ მოგვეცი აფხაზეთი გვჭირდება სოჭის ოლიმპიადისთვისო, - ამის შესახებ საქართველოს პრეზიდენტმა მიხეილ სააკაშვილმა "რუსთავი 2"-ისთვის მიცემულ ინტერვიუში განაცხადა. მისივე თქმით, პირველი ცეცხლი რუს სამშვიდობოებს გაუხსნა გრუ-ს სპეცრაზმმა.
"ყველა სიმპტომი იყო იმისა, რომ ეს მზადდებოდა. ახლა რაც დანამდვილებით დადგენილია, ისაა, რომ პირველი ცეცხლი რუს სამშვიდობოებს გაუხსნა გრუ-ს სპეცრაზმმა. ეს ისე ერთი ერთზეა ამოღებული მათი სახელმძღვანელოებიდან. სტალინი როგორც ეუბნებოდა ფინეთს, მოგვეცი კარელია გვჭირდებაო, ისე გვეუბნებოდნენ ჩვენც მოგვეცი აფხაზეთი გვჭირდება სოჭის ოლიმპიადისთვისო. მერე გრუ-ს სპეცრაზმი დადგა გამყოფ ხაზებს შორის, დაუშინა საბჭოთა შენაერთებს და მერე აღშფოთებული მშრომელები გამოვიდნენ. მედვედევი ისტერიულად იმეორებდა: სააკაშვილმა მოკლა სამიათასი კაციო. ურცხვად ისტერიულად იმეორებდა ამას. ამდენი ადამიანი მოკლდა და არ შევიდეთო? ახლა, როცა აღმოჩნდა, რომ 100 კაცია მხოლოდ მკვდარი, ისინიც მებრძოლები... გრუ-ს სპეცრაზმმა გაუხსნა ცეცხლი რუს სამშვიდობოებს, რომ ჰქონოდათ საბაბი. ეს ილარიონოვმაც კარგად გამოიკვლია, რუსმა ჟურნმალისტებმაც და მერე თავადაც წამოცდათ სამხედროებს. ძალიან ბევრი ინფორმაცია დაგროვდა და 5 წლის თავზე კიდევ იმის ძახილი, რომ საქართველომ რაღაც პროვოცირება მოახდინა, თუ მთლად ძალიან უნამუსო არ ხარ, არის შეუძლებელი", - განაცხადა სააკაშვილმა.
