საბოლოო ჯამში ისტორია განგვსჯის, რადგან ქართული სახელმწიფოებრიობა ჩვენ გადავარჩინეთ, - ამის შესახებ საქართველოს პრეზიდენტმა მიხეილ სააკაშვილმა ტელეკომპანია "რუსთავი 2"-სთვის მიცემულ ინტერვიუში განაცხადა. მისი თქმით, საქართველოს დრო არ ჰქონდა ომისთვის მომზადებულიყო და საქართველოს ჰქონდა ყველაზე პატარა ბიუჯეტი სამხრეთ კავკასიაში, ერთ-ერთი ყველაზე პატარა ბიუჯეტი დსთ-ის ქვეყნებში.
"დავიწყეთ იქედან, რომ არაფერი გვქონდა; ეს ნათელი დასტურია იმისა, რომ შარზე იყვნენ, რა თქმა უნდა, დრო არ გვქონდა იმისთვის, რომ მოვმზადებულიყავით, მაგრამ მე კიდევ მინდა დავსვა კითხვა, საქართველოს ისტორიას ახსოვს ბევრი გმირი მეფე, რომელიც ბევრ უიმედო ომში ჩაერთო, მე არ მახსოვს რომელიმე მეფე გმირად გამოეცხადებინათ მხოლოდ იმიტომ, რომ მტერს ყველაფერი ჩააბარა, ხელი დაიბანა და გაიქცა. ვახტანგ მეექვსე მაგარი განათლებული, მაგარი კაცი იყო, მაგრამ ერთ მშვენიერ დღეს მოკიდა თავის საუკეთესო ხალხს ხელი, დაკრა ფეხი და გადაიხვეწა. რაც არ უნდა "ვეფხისტყაოსანი" დაბეჭდო, მან ქვეყანა მიატოვა და წავიდა. მე დავდე ფიცი აღმაშენებლის საფლავზე. ნამდვილად არ ვადარებ თავს აღმაშენებელს, მაგრამ ყველა დემოკრატიულ მმართველს უნდა რაღაც სტანდარტს მისდიოს, ქართველ ხალხს არ მოუცია ჩემთვის მანდატი, რომ მტერს ჩააბაროს ქვეყანა და თუნდაც უიმედო ბრძოლაში, სრული კაპიტულაცია გამოაცხადოს, ეს იყო, რა თქმა უნდა, ძალიან მძიმე ბრძოლა, საბოლოო ჯამში ისტორია განგვსჯის, რადგან ქართული სახელმწიფოებრიობა ჩვენ გადავარჩინეთ", - განაცხადა სააკაშვილმა.
