"ოკუპაციას ყოველთვის მოყვება დეოკუპაცია. პრაქტიკულად, რუსეთი შევიდა ისტორიულ ჩიხში, საიდანაც გამოსავალი არის დანარჩენი საქართველოს დაპყრობაც, რისი იმედიც მათ, რა თქმა უნდა, არ აქვთ მოშლილი ან ოკუპირებული ტერიტორიების დათმობა,"- ამის შესახებ საქართველოს პრეზიდენტმა მიხეილ სააკაშვილმა ტელეკომპანია "რუსთავი 2"-სთვის მიცემულ ინტერვიუში განაცხადა.
პრეზიდენტის თქმით, "ჩვენ მივეცით რუსეთს ყველაფერი, რისი მიცემაც შეგვეძლო, ნატო-ზეც უარს ვამბობდით და ყველაფერზეც, გარდა საქართველოს ტერიტორიებისა".
"იმისთვის, რომ კრავის როლიდან გამოხვიდე, უნდა გქონდეს მგელზე დიდი კბილები და მგელზე დიდი თავხედობა და ბოროტება. არ მგონია, რომ საქართველოს ინსტინქტში იყოს ეს. ჩვენ ყოველთვის გვყავდა დიდი დამპრყობლები და ყოველთვის გვქონდა ცდუნება ამ დიდი დამპყრობლებისთვის ენა მოგვეჩლიქა. კი, მე ვიყავი პირველი ლიდერი დსთ-ის ქვეყნებიდან, რომელმაც თავი არ დაუხარა რუსეთს, მაგრამ შევარდნაძე რომ უხრიდა თავს, კარგი ჩიტი დაიჭირა?! ყველაფერზე მოაწერა ხელი და არაფერი მიუღია სანაცვლოდ. როცა მითხრეს, რომ ჩვენი უშიშროების მინისტრი უნდა ყოფილიყო ვალერი ხაბუძანია, ის მეორე დღესვე მოვხსენით; რაც მთავარია, პირველად კავკასიაში, ჩვენ ავაშენთ სახელმწიფო. რა თქმა უნდა, შეგვიძლია ვილაპარაკოთ, რომ პატრიარქი ჩავიდა და სახალხო დიპლომატიით უნდა გადაწყდეს პრობლემები. სახალხო დიპლომატია კარგია. ჩვენ ხალხთან უნდა გვქონდეს ურთიერთობა. მე ველოსიპედით ვსეირნობდი და რუსები შემხვდნენ, სურათებიც გადავიღე მათთან, კიდეც ვესაუბრე, მაგრამ არსებობს რაღაც ამ ყველაფრის უკან, უნდა გახსოვდეს, რომ მტერი არის მტერი, მოძულე არის მოძულე. ჩვენ არასოდეს უნდა ვიყოთ აგრესიულები. ჩვენ მივეცით რუსეთს ყველაფერი, რისი მიცემაც შეგვეძლო, ნატო-ზეც უარს ვამბობდით და ყველაფერზეც, გარდა საქართველოს ტერიტორიებისა", - განაცხადა მიხეილ სააკაშვილმა.
