საქართველოს პრეზიდენტ მიხეილ სააკაშვილის განცხადებით, მან რუსეთის ფედერაციის პოლიტიკურ ხელმძღვანელობას აჭარა წაართვა როგორც კრავი მგელს.
როგორც სააკაშვილმა ტელეკომპანია "რუსთავი 2"-სთვის მიცემულ ინტერვიუში აღნიშნა, "როდესაც მან აჭარის დაბრუნების შემდეგ ვლადიმერ პუტინს დაურეკა და რეგიონის საქართველოში რეინტეგრაციისთვის კონსტრუქციული როლისთვის შესრულებისთვის მადლობა გადაუხადა პუტინმა უთხრა, რომ "აჭარაზე დაეხმარნენ, მაგრამ აფხაზეთსა და ცხინვალზე იმავეს ვერ მიიღებდნენ".
"პირდაპირ მითხრა - შენ მე ერთხელ გამაცურე, მაგრამ შენი მოსატყუარი კბილი მოცვლილი მაქვს და ამას ვეღარ ეღირსებიო. დსთ-ს სამიტზე პუტინთან პირისპირ შეხვედრისას მან უხეშად გამაფრთხილა რომ ჩრდილოეთ კვიპროსის მსგავს სცენარს მომიწყობდა. ჩრდილოეთ კვიპროსი ნიშნავს, რომ ვითომ შენ იწყებ ომს, შემდეგ ის გპასუხობს, შენს ტერიტორიებს იპყრობს და აღიარებს მათ დამოუკიდებლობას. მე მასთან მშვიდად დალაპარაკებას ვცდილობდი. მართალია, რუსულ მედიაში ხშირად ავრცელებენ სხვადასხვა სახის ინფორმაციას, მაგრამ მე არასოდეს დავლაპარაკებივარ პუტინს უხეშად", - განაცხადა მიხეილ სააკაშვილმა.