საქართველოს პრეზიდენტ მიხეილ სააკაშვილის განცხადებით, "2008 წლის აგვისტოს ომის დროს გმირულად დაღუპული სამხედრო მოსამსახურე გიორგი ანწუხელიძე ამაყი და წელში გაუტეხავი საქართველოს სიმბოლოა, რომელსაც დამპყრობელი ახტება და ცდილობს წელში გატეხოს, მიწასთან გაასოწოროს, მაგრამ მაინც წელში იმართება და ბოლომდე არ კარგავს ღირსებას".
როგორც პრეზიდენტმა ქვემო ალვანში, გარდაცვლილი ჯარიკაცის ოჯახში სტუმრობისას აღნიშნა, "სანამ გიორგი ანწუხელიძის სახელი არსებობს, არსებობს იმის განცდა, რომ საქართველოსთვის ბრძოლა ღირს და სიკვდილიც ღირს".
"სანამ გიორგი ანწუხელიძისნაირი ქართველები გვყავს, საქართველოს გადაშენება არ უწერია. ვიღაცეებს სასაცილოდ არ ჰყოფნით და ამბობენ რომ ჯარი არაფერში გვჭირდება და უნდა გავაუქმოთ. ჯარი თუ არ გვჭირდება, მაშინ ქვეყანა რაში გვჭიდება, სახელმწიფო რაში გვჭირდება. არ არის ჯარი - არ არის სახელმწიფო, არ არის სახელმწიფო - არ არის საქართველოს ისტორია და საქართველოს მომავალი. ის ხალხი ვინც ამას ამბობს, პოლიტიკოსები თუ არაპოლიტიკოსები, მართლა გულწრფელად მგონია ხანდახან, რომ საერთოდ მთელი ცხოვრება მონობაში ყოფნას იმსახურებენ და არაფერს კარგს და თავისუფლებას არ ეღირსონ. მაგრამ ის ერი, ის სოფელი, ის ოჯახი, ის მხარე, რომელმაც გაზარდა გიორგი ანწუხელიძე, ნამდვილად იმსახურებს, რომ ჰქონდეს სახელმწიფო. 2008 წელი იყო ჩვენი ომი საქართველოს დამოუკიდებლობის და დამპყრობლისგან გათავისუფლების. დამპყრობელმა, რომელმაც ეკონომიკური, ენერგეტიკული ემბარგო და ყველანაირი პროვოკაციები მოგვიწყო და ბოლოს, ვერც შიგნიდან და ვერც გარედან ვერაფერი რომ ვერ გააწყო, პირდაპირ შემოვიდა ომით და თუ არა გიორგისა და სხვა ქართველი მებრძოლების გაუტეხელი გმირობა, ქართული სახელმწიფო დღეს არ იარსებებდა და საქართველოს მომავალი აღარ ექნებოდა. პოსტსაბჭოთა სივრცეში ჩვენ პირველად შევქმენით პუტინის კოშმარი - ნამდვილი სახელმწიფო და ნამდვილი სახელმწიფო მათ შორის ეფუძნება პატრიოტებს, გმირებს და ჯარს. ჯარის გარეშე სახელმწიფო არ არსებობს. ბრიყვია ის, ვისაც მიაჩნია, რომ საქართველოს ჯარი არ უნდა ჰყავდეს, ან ძალიან უმნიშვნელო უნდა ჰყავდეს. ბრიყვია ის, ვინც კითხვის ნიშნის ქვეშ სვამს, უნდა გაგვეწია თუ არა წინააღმდეგობა. გიორგი ანწუხელიძემ ეს არ დასვა კითხვის ნიშნის ქვეშ და იგი მართლა არის ჩემთვის საქართველოს სიმბოლო. საქართველოსი, რომელსაც თავზე ათასი გადამთიელი, მომხდური, გარეწარი, დამპყრობელი ახტება და ცდილობენ, რომ წელში გატეხონ, მიწასთან გაასოწორონ და მაინც წელში იმართება ბოლომდე და ბოლომდე არ კარგავს ამ ღირსებას და სიამაყეს. 9 ძმა ხერხეულიძეები, ცოტნე დადიანი და ბევრი სხვა ჩვენი გმირი ვიდეოზე არ გვინახავს და მე ვიტყოდი, რომ გიორგი ანწუხელიძე არის პირველი დიდი ქართული გმირობა, რომელიც შემოინახა ვიდეომ, რომლის ნახვაც მომავალ თაობებს შეუძლიათ. და როდესაც ამ გმირობას ვუყურებ მართლა ვხვდები რამ გადაარჩინა წინა საუკუნეებში საქართველო, როცა ვიდეო არ არსებობდა და "იუთუბი". ახლა მობილურიც არსებობს, ვიდეოც, მაგრამ გმირობის შინაარსი არ შეცვლილა. იარაღიც სხვანაირია, არმიაც სხვანაირია. გმირი ან ხარ ან არ ხარ. ლაჩარი ან ხარ, ან არ ხარ. ძალიან ბევრს თვალშიც არ ხვდება გიორგი ანწუხელიძის გმირობა, რადგან მაში საკუთარ ლაჩრობას ვეღარ ამართლებს. სანამ გიორგი ანწუხელიძის სახელი არსებობს, არსებობს იმის განცდა, რომ საქართველოსთვის ბრძოლა ღირს და სიკვდილიც ღირს. მას ყველაზე მეტად უყვარდა სიცოცხლე და ვისაც ყველაზე მეტად უყვარს სიცოცხლე, ის არის თავდადებული. ვისაც არც თავი უყვარს, არც სამშობლო უყვარს, მისგან არაფერი დადგება. გიორგი ანწუხელიძის სახით, ნამდვილი გმირი მთელმა საქართველომ და მსოფლიომ ნახა, ასეთი რამეები არ ხდება არც აფექტში, არც შემთხვევით. ასეთად ბავშვობიდან დედამ უნდა გაგზარდოს და გარემოებამ გაგზარდოს,"- განაცხადა მიხეილ სააკაშვილმა.