საქართველოს პრეზიდენტ მიხეილ სააკაშვილის გადაწყვეტილებით, სოფელ ქვემო ალვანში 2008 წლის აგვისტოს ომის დროს გარდაცვლილი სამხედრო მოსამსახურის გიორგი ანწუხელიძის მონუმენტი დაიდგმება.
ამის შესახებ პრეზიდენტმა დღეს გარდაცლილი სამხედრო მოსამსახურის ოჯახში სტუმრობისას განაცხადა.
მიხეილ სააკაშვილმა დაღუპული ჯარისკაცის დედასთან 2008 წლის ომში მისი შვილის გმირობის მაგალითი კიდევ ერთხელ გაიხსენა და მას გმირის გაზრდისთვის მადლობა გადაუხადა.
"სწორედ ასეთი გმირების თავდადებაზე დგას საქართველოს სახელმწიფოებრიობა, დამოუკიდებლობა და თავისუფლება. გიორგი ანწუხელიძის პატივსაცემად, სოფელში მონუმენტი დაიდგმება. ეს მართლაც წარმოუდგენელი გმირობაა. ვიღაცას შეიძლება არ ესმოდეს, მაგრამ ყველა სკოლაში უნდა ისწავლებოდეს გიორგი ანწუხელიძის, ზაზა დამენიას, ჟიული შარტავას გმირობა - რას ნიშნავს ეს საქართველოსთვის, რატომ არის მნიშვნელოვანი და რატომ გადარჩა ეს ერი,"- განაცხადა მიხეილ სააკაშვილმა.
ქვეყნის პირველმა პირმა, გიორგი ანწუხელიძის დედასთან ერთად ის ადგილიც მოინახულა, სადაც გმირულად დაღუპული სამხედრო მოსამსახურის ძეგლს დადგამენ.
ამასთან, საქართველოს პრეზიდენტის ინიციატივით, გიორგი ანწუხელიძის სახელი ალვანისა და თბილისის ერთ-ერთ ქუჩას მიენიჭება.
