საქართველოს პრეზიდენტ მიხეილ სააკაშვილის განცხადებით, "რუსეთის მხრიდან ტერიტორიული მთლიანობის აღდგენაში დახმარების შემთხვევაში, საქართველოს ხელისუფლება მზად იყო, მისი ტერიტორიის მნიშვნელოვან ნაწილში რუსული ეკონომიკური ინტერესები გრძელვადიანად დაეკანონებინა და ამერიკის შეერთებულ შტატებთან და ნატო-სთან ურთიერთობაზე ხელშეკრულებით ეთქვა უარი".
ამის შესახებ პრეზიდენტმა ტელეკომპანია „რუსთავი 2"-ისთვის მიცემულ ინტერვიუში ისაუბრა და აღნიშნა, რომ აღნიშნულ შეთავაზებაზე რუსეთის მაშინდელი პრეზიდენტის ვლადიმერ პუტინის პასუხი არასერიოზული იყო.
„ჩვენ ვუთხარით რუსეთის დელეგაციას, რომ მზად ვართ, ნატო-ზე ვთქვათ უარი. ვადასტურებ, რომ ასე ვუთხარი. ჩვენს დელეგაციაში 6 თუ 7 წევრი იყო: გელა ბეჟუაშვილი, ვაშაძე, თუ არ ვცდები, ბაქრაძეც და კიდევ რამდენიმე. რუსული დელეგაციაც საკმაოდ მრავალრიცხოვანი იყო. ჩვენ მათ ვუთხარით, რომ "მზად ვართ, ნატო-ზე უარი ვთქვათ, ხელშეკრულებით ვთქვათ უარი ამერიკასთან უფრო წინ წასულ ურთიერთობებზე, თუ თქვენ დაგვეხმარებით ტერიტორიების მხრივ პროგრესზე", ოღონდ ეს ხელშეკრულებით უნდა დაფიქსირებულიყო. ამაზე პუტინი არც დაფიქრებულა, შემოგვხედა, გაიღიმა და თქვა, „ბიჭებო, ჩვენ თქვენს ტერიტორიებს, თქვენს გეოპოლიტიკურ ორიენტაციებზე არ ვცვლითო", რაც ნიშნავდა, „ტერიტორიებს ისედაც წაგართმევთო",- განაცხადა მიხეილ სააკაშვილმა.
პრეზიდენტმა რუსეთის ფედერაციის პოლიტიკური ხელმძღვანელობისთვის მის მიერ გაგზავნილი წერილის შინაარსიც გაიხსენა და აღნიშნა, რომ მსგავსი შინაარსის გზავნილის გამო, საერთაშორისო საზოგადოებას საქართველოს ხელისუფლებასთან სერიოზული კითხვები გაუჩნდა.
„ამ წერილში მე ვეუბნები, "ვიცი, გაქვთ ინტერესები: გუდაუთის ბაზა, სოხუმის აეროპორტი, მით უმეტეს სოჭის ოლიმპიადისთვის, პორტი. ეს ყველაფერი მესმის, ჩვენ გვაქვს დევნილების შეყვანის პრობლემა, რადგან თქვენ დგახართ ენგურის ერთ მხარეს, ენგურს იქეთ კი ჩვენ ხალხს ვერ ვუშვებთ. მოდით, კოდორზე გადაინაცვლეთ რამდენიმე ათეული კილომეტრით, ყველაფერი რაც თქვენ გაინტერესებთ, კოდორის ჩრდილოეთით ხდება, ამის სანაცვლოდ ჩვენს დევნილებს საერთაშორისო ადმინისტრაციის და არა ქართულის ქვეშ შევიყვანთ, სამაგიეროდ დაგიკანონებთ სოხუმის აეროპორტს, დაგიკანონებთ ყველა თქვენს ეკონომიკურ ინტერესს ბიჭვინთაში, გაგრაში, სოხუმში, სოხუმის რკინიგზით სარგებლობას, გავხსნით რკინიგზას სომხეთზე. გაკითებთ ყველაფერს, რაც გინდათ, თუ თქვენ, რა თქმა უნდა, ომი არ გინდათ". ომი რა თქმა უნდა, არ მიხსენებია, მაგრამ ვიფიქრე, რა შეიძლება, მოვიფიქრო თუ მათ მართლა ომი არ უნდათ, რომ ყველაფერი მიცეთ და დავწყნარდეთ თქო. ამაზე ბევრმა უცხოელმა თქვა "თქვენ პრაქტიკულად, აფხაზეთის გაყოფას სთავაზობთო". რა თქმა უნდა, ეს აფხაზეთის გაყოფა არ იყო, რადგან ჩვენი სუვერენიტეტი რჩებოდა, მაგრამ დე-ფაქტო ვაკანონებდით გრძელვადიანად მათ ინტერესებს ძალიან მნიშვნელოვან ნაწილში",-განაცხადა მიხეილ სააკაშვილმა.