საქართველოს პრეზიდენტ მიხეილ სააკაშვილის განცხადებით, "ქვეყნის ყოფილმა ხელისუფლებამ პოსტსაბჭოთა სივრცეში პირველად შექმნა პუტინის კოშმარი - ნამდვილი სახელმწიფო".
ამის შესახებ პრეზიდენტმა ქვემო ალვანში, აგვისტოს ომში დაღუპული გმირის გიორგი ანწუხელიძის ოჯახში სტუმრობისას განაცხადა და დასძინა, რომ "2008 წელს საქართველოს დამოუკიდებლობის და დამპყრობლისგან გათავისუფლების ომი იყო".
"დამპყრობელმა, რომელმაც ეკონომიკური, ენერგეტიკული ემბარგო და ყველანაირი პროვოკაციები მოგვიწყო და ბოლოს, ვერც შიგნიდან და ვერც გარედან ვერაფერი რომ ვერ გააწყო, პირდაპირ შემოვიდა ომით და თუ არა გიორგისა და სხვა ქართველი მებრძოლების გაუტეხელი გმირობა, ქართული სახელმწიფო დღეს არ იარსებებდა და საქართველოს მომავალი აღარ ექნებოდა. პოსტსაბჭოთა სივრცეში ჩვენ პირველად შევქმენით პუტინის კოშმარი - ნამდვილი სახელმწიფო და ნამდვილი სახელმწიფო მათ შორის ეფუძნება პატრიოტებს, გმირებს და ჯარს. ჯარის გარეშე სახელმწიფო არ არსებობს. ბრიყვია ის, ვისაც მიაჩნია, რომ საქართველოს ჯარი არ უნდა ჰყავდეს, ან ძალიან უმნიშვნელო უნდა ჰყავდეს. ბრიყვია ის, ვინც კითხვის ნიშნის ქვეშ სვამს, უნდა გაგვეწია თუ არა წინააღმდეგობა", - განაცხადა მიხეილ სააკაშვილმა.
მასალის გამოყენების პირობები